Ministro Dangui Oduber papiando di Fase 4 y 5
ORANJESTAD (AAN): Tabata na 2023 cu Minister Dangui Oduber a anuncia e proyecto di “beautification of Eagle Beach”, cual awendia ta den su fase final. E proyecto aki ta di embeyece henter e strip di Eagle Beach den cuadro di e mehoracion di nos producto Aruba y lo percura pa uniforma e paisahe cu flornan y piedranan blanco, pone mas bari di sushi pa henter e strip. Asina lo logra pa e strip por keda mas organiza y miho structura, tambe pa tin un miho maneho di desperdicio den e area aki. En total lo ta un experiencia mas agradabel pa nos bishitantenan y nos localnan.
Eagle Beach su strip ta worde embeyece di rotonde di Amsterdam Manor te cu e rotonde di Alhambra. Actualmente ta den e fase 4 y 5 cual ta e ultimo parti banda di Costa Linda.
Un colaboracion entre Tourism Product Enhancement Fund (TPEF), Aruba Tourism Authority (ATA), DOW y conhuntamente cu tur e general managers di e propiedadnan hotelero cu a percura pa hunto, nan compromete pa haci mantenimentonan necesario den futuro. Minister ta kere den public-private partnership, unda nos tur ta traha hunto pa eleva e producto Aruba.
Finalmente Minister Dangui Oduber ta sumamente contento cu e colaboracion y cooperacion di tur “partners” cu ta haciendo e proyecto aki bira un realidad y pa sigui eleva e producto Aruba. E proyecto ta avansando y manera cu esaki ta cla lo mira un cambio den e area aki pa uno mas bunita y mihor organiza.
