Meverly Romano, PR di Departamento di Impuesto:
ORANJESTAD (AAN) Na e momentonan aki tur automobilista y persona cu tin vehiculo di motor mester tin e prome mitad di e belasting di aña 2024 paga. Pero esaki no ta conta pa tur categoria. Por ehemplo brommernan y esnan cu tin un plachi personaliza nan mester paga e impuesto di full e aña di un solo biaha, of por hacie poco, poco, pero na final di dia ora e deadline yega, full e aña mester ta paga.
Asina e Relacionista Publico di Oficina di Impuesto (DIMP), señora Meverly Romano a informa, den entrevista cu DIARIO.
Romano a sigui bisa cu mayoria di contribuyente si ta paga mita aña y despues e otro mita.
“Na e momento aki, mi por bisa cu durante e luna di Januari nos a yega na mas di 90 mil auto registra. Aworaki nos tin 90.191 number registra di vehiculo di motor, di diferente categoria, y nos ta mira cu esaki ta keda aumenta diariamente. Constantemente, nos tin cliente cu ta bin cerca nos, pa registra nan auto, sea nan a cumpra auto nobo, of auto segunda mano, y nan ta desea un number”, Señora Romano a indica.
El a sigui bisa cu DIMP ta nota cu nan ta aumentando basta lihe, y si nan a yega 90.191, y e cifra aki ta keda cambia tur dia por wak caba cu ta bayendo den direccion di 100 mil vehiculo di motor cu lo wordo registra den e proximo añanan.
Meverly Romano a señala tambe cu pa loke ta trata e cumplimento di pago di impuesto, tin 51.6% di e cantidad di plachinan cu e automobilistanan a paga full e aña, kiermen belasting di henter e aña 2024.
“Tambe nos tin un parti, 28.9% cu a paga mitad aña 2024 y den nan dos e cumplimento ta yega na 85%. Kiermen, nos ta satisfecho cu esaki. Si nos ta na 80% of 81% nos por bisa cu e cumplimento ta bayendo den bon direccion. Nos tin e ora ey e cantidad di 72.560 number cu tin pago riba nan, sea a paga full e aña of mitad aña, pero tin pago riba nan, y esey ta un desaroyo hopi positivo pasobra nos ta na casi 81% di cumplimento”, Relacionista Publico di DIMP, señora Meverly Romano a duna di conoce.
El a subraya cu DIMP ta gradici tur e automobilistanan cu a cumpli, pasobra no cumpli no ta un opcion. E boet ta halto, pasobra e ta 50% di loke mester paga, y awendia cu tur persona ta wak nan cartera, no ta cumbini pa postpone e pago. “Nos ta mira cu comunidad ta duna oido na esaki ta tene cuenta cu e fecha final. Aworaki, nos ta yegando e di dos fecha final di aña cu ta dia 1 di Juli. Normalmente, esaki tabata dia 30 di Juni, pero como cu e ta cay riba un Diadomingo, e fecha ta bira 1 di Juli”, Señora Romano a menciona.
Kiermen, pa dia 1 di Juli e di dos mita di aña 2024 lo mester ta paga. E ta nifica cu ainda tin tres luna pa e personanan cu ta desea di haci pago parcial riba nan belasting, nan por hacie.
