Programa Let’s Act den Centro di Bario Playa Pabao a conclui cu un bunita exposicion

Valerie Willer-Heronimo  hopi orguyoso di e alumnonan

ORANJESTAD (AAN)-- Señora Valerie Willer- Heronimo, den un entrevista cu DIARIO, a elabora tocante e programa di Let’s Act cu el a desaroya den Centro di Bario Playa Pabao, pa seis luna largo, y cu a conclui cu un bunita exposicion. E alumnonan ta mucha di mesun bario aki.

   “E ta seis luna largo unda muchanan entre 8 cu 12 aña, nos a cuminza den e aventura akinan, hopi simpel. E intencion tabata cu hunto nos ta crea un comunidad di Arte akinan, na Centro di Bario Playa Pabao, y hunto cu e muchanan no solamente uza arte pa pinta, pero tambe pa regula emocion.

Pues arte pa busca un miho manera, un manera positivo pa pasa bo tempo, eigenlijk”, señora Willer-Heronimo a relata.

   E muchanan ta bin despues di scol, nan ta haya algo di come, nan ta haci nan huiswerk y ta yuda otro hacie tambe, y despues nan ta cuminza cu arte.

   “Arte ta enfoca hopi riba nan mes, dus, kico ta locual ta haci nan unico, nan mester a traha un bandera pa un oficina, y uno pa nan mes cu cosnan cu ta importante pa nan. Un color berde ta naturaleza, un color cora ta power, gel ta luz, y esey ta simbolonan. Kiermen, con si bo ta diseña un bandera, cu ta algo unico di bo mes, con e ta mustra. Pues asina aki nos a traha cu e muchanan pa seis luna largo, crea un grupo super great di ‘art community’ pa hunto nos yega awe na un exposicion. Mi ta orguyoso di nan trabao, nan a representa nan mes, eigenlijk hopi bon”, señora Willer-Heronimo a señala.

   Aworaki e programa a cuminza pa hobennan di 13 pa 17 aña, cu ta bay ta te fin di November, y e sistema ta mescos, di “Let’s Act’. “Nos ta uza arte como vehiculo pa bo sinti bo miho, pa bo yuda eigenlijk bo mes, pa bo ta den bon caminda. Hopi hoben ta riba telefon, riba tik-tok, pero esaki ta un manera saludabel di pasa bo tempo y ta creativo tambe. Asina nos ta spera tambe di traha preventivamente, cu e meta cu e muchanan aki sa cu tin asina hopi manera pa yuda bo mes, y arte ta un di nan”, señora Willer- Heronimo a conclui. Ainda tin cinco lugar habri pa hobennan, y por comunica cu Centro di Bario Playa Pabao.