Kompas for Students Aruba cu hermentnan util
ORANJESTAD (AAN): Nan a bira bon conoci caba! Ta trata aki di e organizacion ‘Kompas for Students Aruba Foundation”, y nan ta cla pa yuda e grupo nobo di studiantenan di Aruba cu ta bayendo rumbo Hulanda pa studia.
Nan tin un sorto di crash-course di 3 dia pa e studiantenan aki, pa nan actividad yama ‘Kompas 2024’. Pa bo participa na esaki, bo tin di aplica rapidamente na e website aki:
Kompas for Students Aruba Foundation ta contento di anuncia cu registracion pa Kompas 2024 ta habri oficialmente. Na prome lugar Viviana y Deon kier felicita tur studiante cu a gradua! Bo trabao duro y dedicacion a duna su fruto, y awor ta tempo pa prepara pa e proximo capitulo di bo educacion.
Detaye di Programa: Esaki lo bay ta for di Dialuna 8 di Juli te cu Diaranson 10 di Juli. Nan lo pone fecha adicional asina cu e gruponan ta yena. E lo ta for di 10:00 am te cu 5:00 pm. Lo bay cobra un suma di cien florin pa participacion. Segun e Fundacion, e contribucion aki lo inclui programa di 3 dia na Aruba (+ cuminda, worksheets, y transport pa les di cushinamento), sosten y guia durante 1 aña na Hulanda, y acceso na plataforma online di salud mental.
Pakico participa den Kompas 2024: Durante e programa, tanto Viviana Lopez-Paz y Deon Bisslik ta duna bo e informacion, herment y sosten cu bo mester pa sobresali como un studiante nobo na Hulanda. Nan programa ta cubri varios tema importante, pa asina bo ta prepara bon pa e reto y oportunidadnan cu ta bini aki par di siman. Bo lo haya informacion di professional nan riba topico manera: (*) Nutricion, (*) Bienestar Emocional, (*) Bienestar Fisico, (*) Les di cushinamento, (*) Finanzas, y (*) Planning.
Ademas, bo lo tende di studiantenan cu ta studiando na Hulanda, kende lo comparti nan experiencia y tips. Nos team dedica lo ta na bo disposicion pa duna bo sosten, especialmente durante bo prome aña na Hulanda. Tambe lo tin un sorpresa. Bay registra, debi cu cupo ta limita.
Kompas for Students Aruba Foundation ta un fundacion crea door di Viviana Lopez Paz y Deon Bisslik como young professionals y studiante Arubiano. Nan meta ta pa guia y sostene studiante den nan preparacion pa studia afo y durante nan prome aña na Hulanda. Durante e trayectoria aki nan ta brinda diferente workshop y actividad riba topico manera mental health, finanzas, nutricion y hopi mas. Nan website ta kompasforstudents.com
