Elsa Krozendijk, di CEDE Aruba:
ORANJESTAD (AAN) Elsa Krozendijk a expresa, den conferencia di prensa, cu e ta hopi contento y entusiasma cu e di cuater edicion di Ban Caya, cu ta bay tuma lugar den Dakota.
“Nos tabata na Noord, nos tabata na Paradera, nos a bay San Nicolas, y aworaki Dakota a haya e oportunidad pa nos por bay celebra Ban Caya”, el a expresa.
Elsa Krozendijk a sigui splica cu e iniciativa di Ban Caya a cuminza door di Barionan Unico, proyecto di CedeAruba, unda cu nan ta trece comunidad hunto den cada bario y dunando tambe, asina aki, e importancia di e Centro di Bario, den e bario.
“Na unda cu e comunidad completo por uni bin hunto, y asina aki conoce kico tur nan centro di bario tin pa ofrece.
Nos di Cede Aruba, sigur ta sumamente contento y ta felicita Centro di Bario Dakota, ya caba, pa loke ta iniciativanan cu nan tin durante 2024 aki, cu nos ta cuminza cu e proyecto y esey ta pone cu nos kier pa mas di e comunidad bin cerca, no solamente Dakota pero henter e vecindario”, Krozendijk a bisa.
El a reitera cu asina e comunidad conoce kico Centro di Bario Dakota tin pa ofrece, fuera di futbol, basketball y aworaki skateboarding, parti paden. Tur dialuna tin e wega di wow mobile cu tambe a incorpora den Centro di Bario Dakota pa tur dialuna atardi e muchanan por siña hunto cu IBiSA, cu diferente movecion y deporte cu ta wordo haci.
