ORANJESTAD (AAN) – Rachell Peterson, miembro di United Farmers Aruba, den entrevista cu DIARIO a comenta cu e union di agricultornan ta hopi importante,
pasobra uni nan por yega hopi mas caminda, nan voz ta wordo hopi mas scucha y cu cada ken su ideanan nan ta respalda y inspira otro. Pues, e comunidad di farmers ta hopi importante.
Rachell ta produci mushrooms. Nan ta planta mas di 35 specie di mushrooms exotico y nan tin e den supermercado, restaurantnan, y tambe hotelnan.
Rachell a cuminza cu e plantacion aki for di chikito y p’e tabata un hobby y e tin pasion p’e, pero e no tabata facil, el a topa cu hopi reto y na Aruba loke ta agricultura no ta facil, pasobra no por haya tereno, y si haya tereno di oma of opa tin hopi regla anticua cu mester deal cu nan.
“Pa ta un farmer na Aruba bo mester ta hopi creativo y si bo tin e pasion p’e bo ta logra. Mi ta hopi contento di locual mi a logra pero mi ta sinti cu tin hopi cos na Aruba cu ta tene nos atras”, Rachell a menciona.
El a bisa cu si e tabata su produccion na Bonaire lo a haci hopi mas pasobra nan tin mas manera pa ayuda e cunukeronan, compara cu Aruba.
“Mi ta sinti cu e sector aki a wordo basta ignora. Mi a scucha di un par di cos nobo, pero nada concreto. Ningun hende a yuda nos cu tereno, ni sali dilanti bisa cu nan ta bay yuda e cunukeronan of agricultornan”, Rachell Peterson a reitera.
El a agrega cu na Aruba tin cierto leynan obsoleto, cu e persona no por haci cierto cosnan riba e tereno, cu ta cosnan super bieu cu mester wordo revisa. Na momento cu lo tin cambio di gobierno, tin varios aspecto cu United Farmers kier presenta na e gobierno nobo, vooral e tema di tereno. Asina Rachell a comenta. Y por ehemplo, e belasting cu tin y BBO na Frontera tin efecto riba nan, y na dado momento nan lo mester hisa prijs di nan productonan.
Finalmente, Rachell a haci un invitacion na esnan cu ta interesa den drenta den tereno di agricultura, pa acudi na e reunion di Diaranson 13 di November, y wak si nan kier bira miembro di e Organizacion United Farmers Aruba.
