Productor di Film Desiree Croes cla pa su presentacion di “Bruha bruha 2”

Despues di hopi bon feed back di e prome:

ORANJESTAD (AAN)-- Señora Desiree Croes, den entrevista cu Matutino Diario a menciona, cu banda di su trabao diario un di su hobynan semper tabata haci comedia y film.

“Banda di 2014, mi a cuminza bek cu trahamento di film, y mientras tanto el a traha 12 film, di cualnan tres ta filmnan largo, y e ultimonan dos ta un ta ‘E  bruha bruha’. Un a sali caba na luna di Maart di e aña aki y e ‘bruha bruha’2 cu ta bay sali e siman cu ta bin”, Desiree Croes a menciona.

Croes a expresa cu e produccion aki a bay fantastico. El a traha cu un tremendo team, cu un dinamica fabuloso, cu nan a pasa hopi dishi cu o tro.

“E feed back tabata asina bon cu mesora mi a pensa pa bay di biaha pa otro; e parti 2 di e mesun tema. Eigenlijk e tema ta over turismo; cu na Aruba tin hopi turismo cu nos ta perde nos mesun identidad. E tema ta tambe nos tradicionnan di antes, cu tin hende ta keda den esey te awendia, y mi kier a mustra cu hopi cos ta gañamento, cu no ta real,pero toch bo ta kere den dje, y den e film bo ta wak cu cierto cosnan ta berdad toch”, Desiree Croes a señala.

El a agrega cu toch e tin algo magico, mistico den e film, cu tin diferente mensahe y eigenlijk cada  persona por experiencia e mensahe diferente.

“Despues di bruha bruha uno, mi a papia cu varios persona cu a wak e pelicula, tin di nan a yora, tin di nan a keda hari, y otronan ta keda pensa... e ta los e hendenan, e ta pone hende cu nostalgia con e tabata antes, con Aruba a cambia, ki nos a perde, te unda nos a yega, kico ta e limite, turismo a bira grandi cu bo a cuminza perde bo mes cada momento como Arubiano cu e identidad propio cu nos tin”, Desiree Croes a expresa.