Palabra cla y raspa pa esnan cu no kier compronde - ORANJESTAD (AAN): Riba Diaranson, e reunionnan cu Formador y Stakeholders a sigui, pa asina haya informacion di tur loke diferente gremio y instancia ta pone riba nan lista di deseo pa e siguiente gobernacion.
Diaranson mainta trempan, Procurador General di Aruba tabatin reunion cu Formador.
Procurador General, mr. Bote ter Stege despues di e reunion cu Formador a duna su declaracion na prensa.
Cu Formador y su team a papia di e mantenimento di ley, como tambe tur idea y pensamento cu el como Procurador General tin pa e siguiente 4 añanan di Gobierno.
Tabatin temanan mas grandi, por hemeplo el a mustra riba e Acuerdo Europeo pa Derechonan Humano, y tin di corda cu Hulanda a firma e acuerdo ey, pues Aruba tambe tin di cumpli cune. Y relaciona cu esey el a mustra riba e circunstancianan di detencion
Y den e contexto aki el a señala e circunstancianan di e intencion, specialmente ora cu ta trata di problemanan di personanan cu a wordo someti na medidanan di restriccion, of ora cu ta trata di menornan cu a wordo someti na medidanan.
A papia tambe di e cooperacion cu Autoridadnan Mericano. Aunke Aruba ta forma parti di Reino Hulandes, toch e cooperacion cu e Mericanonan tambe ta importante.
A papia tambe di e fronteranan, y cu esun rond di Aruba ta tambe frontera di Reino. Hulanda ta bay yuda Aruba pa reforza e fronteranan, y esey a informa Formador tambe.
Tambe a papia riba algun topico chikito, e.o. e legislacion pa screening di Ministronan, y papia tiki tambe di e forma con comunidad Arubano ta comporta ora cu politiconan ta bira sospechoso di actonan castigable.
Pero e bishita di Procurador General na Formador ta wordo mira como algo di influencia robez, esta cu PG ta laga su mes wordo influencia door di politiconan?
Aki PG mr. ter Stege a bisa claramente cu e contesta ta no! Politica na Aruba tin ningun influencia riba Ministerio Publico ora cu ta trata di decisionnan di castigonan.
“Nunca e tabata asina, ni bao di e Gobierno anterior ni bao di e Gobierno actual, y bao di un Gobierno nobo tampoco esey lo bay ta,” PG mr. ter Stege a bisa.
“Si acaso un dia esey socede, e ora e Procurador General aki lo retira,” el a bisa.
Pues e ta mustra cu dia cu tin metemento politico den Ministerio Publico, e lo retira.
Relaciona cu e locura publica recien cu Fiscal lo a bisa cu si Ministerio Publico laga Benny Sevinger cera cu AVP lo rabia, y si acaso laga Benny Sevinger den libertad e ora MEP lo rabia, mesora Fiscal mr. Bote ter Stege a bisa cu realmente ta un Huez ta esun cu ta dicidi si hende ta keda encarcela of no.
Y cu den e caso di ex-Ministro Benny Sevinger, varios biaha caba el a presenta dilanti un Huez pa ‘toets’ y tuma decision si e ta keda encarcela of no. Pues no ta Ministerio Publico ta tuma e decision ey.
“Ministerio Publico no ta stipula na final si un hende ta keda encarcela of no,” Procurador General a bisa. “Semper tin un rechterlijke toets eynan, y un Huez na Aruba tambe ta independiente.”
Tambe PG mr. ter Stege a bisa cu desde cu el a asumi e trabao na Aruba, hendenan ta pidi pa laga Ministerio Publico tuma distancia aun mas grandi di Gobierno. Pero Aruba tin su Constitucion y e posicion di Ministerio Publico ta stipula claramente eyden. Un Ministro di Husticia por duna ordo solamente si e pone esaki riba papel, y entrega esaki na Parlamento pa wordo discuti.
E ta kere cu e imagen cu hopi hende ta haya ta Ministerio Publico ta hala hende di personal ta depende a base di decision di Gobierno, ta algo cu nan ta trahando riba dje. Esaki ta un idea cu nan a trece dilanti caba na Gobierno anterior, y na e Gobierno cu ta finalizando aworaki tambe.
Cu speranza ta bay pensa cu mescos cu Raad van Advies, y tambe colaboradornan di Parlamento di Aruba, cu Ministerio Publico lo bay ta aun mas distancia di Gobierno, hasta ora cu ta trata di busca personal pa labora aya, of pa cumpra lessenaar, y busca pen y papel, etc.
