Procurador General a restablece funcionamento di Orden di Ley di Aruba - *Terorismo politico pa tranca base legal nacional ta inaceptabel den democracia - *Posicion di DIARIO fortifica den declaracion oficial cu a wordo haci ayera
ORANJESTAD (AAN) — Segun e Orden di Ley di Aruba, claramente pa medio di Ley ta wordo establece kico ta aceptabel y kico no ta aceptabel den tur sector cu ta forma gobernacion.
Despues di su bishita na Formador, e Procurador General di Aruba a rechasa publicacionnan den cual e ta wordo acusa di a bisa Benny Sevinger cu su actuacion por topa cu rechaso di MEP of di AVP.
Den edicion di ayera DIARIO a mustra riba e base legal di Aruba como pais, cu no ta permiti un Procurador General actua na un forma discriminatorio ora ta trata un persona cu por ehempel un posicion politico.
Cu su palabranan despues di su encuentro du Formador, Procurador General a mustra riba realidad di funcionamento di Ministerio Publico y su posicion personal enfrente su deber sagrado den e sector di Husticia na Aruba.
Awe un pregunta importante ta surgi na Aruba, cu claramente ta victima di terorismo politico di parti di AVP, cu un lider cu yama Mike Eman cu no ta mira kico e ta haci cu moral di un Pueblo, cu e base di concenshi di un Pueblo y hasta cu e base legal di e pais Aruba.
E forma cu Mike Eman a lansa su mes contra mundo di Husticia for di momento cu e problema cu Benny Sevinger a cuminsa, a wordo cuestiona dor di DIARIO ya cu sigur personanan cu kier yama nan mes politico for di cual representantenan gubernamental den Parlamento y Conseho di Ministro mester nace, sigur no por lansa acusacionnan sin mas contra mundo di Husticia, cu na su turno no por afecta nan.
Respet cu mester di tur exponente di e tres pilarnan di Trias Politico, ta bay perdi ora tuma nota di e actuacion di Mike Eman, cu no tin respet ni pa Parlamento, ni pa Conseho di Ministro, ni pa Husticia.
Esaki ta habri caminda pa dictadura, pa fomento di intrankilidad na Aruba, cu a aumenta na forma barbaro debi na e agitacion directo di AVP contra instancianan independiente cu ta garantisa e fundeshe democratico di Aruba.
Democracia no ta permiti e abuso politico di AVP cu a deshaci di normanan moral di Aruba dor di pone un sospechoso, detenido como candidato pa Parlamento di Aruba.
Democracia no ta permiti e hacha cu Mike Eman ta uza den un terorismo politico pa ataca tur loke ta den su caminda pa haci y deshaci cu un Aruba, cu el a herida mortalmente ora el a destrui base financiero y economico di Aruba dor di trapa riba leynan di e pais.
Pa democracia funciona mester tin respet, cu ta duna Pueblo un sentido di trankilidad.
Mike Eman ta e ultimo persona riba Aruba pa mustra dede y causa agitacion contra cualkier persona den funcion despues cu el a trapa riba leynan di Aruba den ehecucion di su trabou.
Dictadura ta loke Mike Eman a demostra ora el a bay contra expertonan di Aruba, deshaci di respet pa Parlamento dor di firma acuerdo cu Nicolas Maduro sin autorisacion di Parlamento y abusa di placa di Aruba, cu mester di trankilidad.
Aruba no por wordo uza pa sirbi interes propio di Mike Eman, cu a demostra di ta stima dictadura pa e haci y deshaci manera e kier hasta si esaki nifica cu Aruba ta zink!
