Minister Geoffrey Wever:
*Despues di hopi tempo den preparacion
ORANJESTAD (AAN) – Minister di Economia, Finanzas, y Sector Primario Geoffrey Wever, den entrevista cu DIARIO a señala cu Departamento di Aduana, mescos cu Departamento di Impuesto, ta colecta tur e entradanan pa Aruba, locual ta hopi vital pa e funcionamento economico di nos pais.
E mandatario a indica cu e ta na haltura di e diferente retonan cu tin den e Departamento di Aduana, y regularmente e tin reunionnan cu e director, y tambe cu e sindicato, y e ta scucha e preocupacionnan cu tin, aunke no tur ora por acomoda tur peticion.
“Siman pasa nos a organiza un encuentro cu e staf di Aduana cu tur e brokernan, den un intento pa mehora e proceso, pa scucha nan preocupacion cu tur dia tin. Un di e preocupacionnan principal cu e tempo pa huur un container nan concepto ta mucho largo, y Aduana no tin suficiente personal, pa por hacie mas lihe. Por wak cu e brokernan ta subraya cu ta necesario pa bin mas hende den e Cuerpo”, Minister Wever a señala.
E mandatario a agrega cu e economia y tambe e importacion a crece drasticamente, y e ora ey Cuerpo di Aduana, naturalmente, tin cu digitaliza y automatiza como parti di e carga, pero importante ta pa e frecuencia ta mas lihe pa huur un container, na interes di Aruba su economia. “Dus, e ta algo cu tin nos atencion, y nos ta ocupa cu ne”, Minister Geoffrey Wever a bisa.
El a agrega cu tin procesonan di digitalizacion cu ya caba ta andando, y nan ta den proceso di termina e legislacion nobo cu Aduana, e ALDA (“Algemene Landsverordening Douane en Accijnzen”) un ley cu tabata den preparacion hopi tempo, aworaki ta den su fase final, segun e dignatario.
“Nos ta yegando na un compromiso cu Hulanda pa un revision tecnico, cu tambe lo yuda e ora ey cu e procesonan ta bay mas automatiza y mas lihe. Y, naturalmente, pa pone hende adicional mester di e fondonan accesible p’esey tambe, y e ta algo grandi y di importancia, y nos ta ocupa cu esey tambe”, Minister Geoffrey Wever a remarca.
