Directora Seraida Pemberton di Reclassering:
*Como resultado ta bin problema cu husticia
ORANJESTAD (AAN): Agresividad bao nos hobennan, ta algo cu ta resalta masha hopi mes. Tin hopi bringamento riba caya y na scol, pero no asina tanto ladronicia.
Asina señora Seraida Pemberton, directora di Reclassering a señala den entrevista cu DIARIO. “Manera nan ta bisa, nos hobennan tin ‘mecha cortico’ con nan ta reacciona mas lihe pa un bringamento, envez di nan busca otro solucionnan”, señora Pemberton a comenta.
Tin diferente factor pero e situacion na cas ta hunta un rol hopi grandi. “Bo ta ripara e problema social bao e hobennan, specialmente por nota den esnan cu ta participa den e trayecto cu ta yuda nan, pero tin caso unda e caso ta uno leve, pero mirando e problema social Reclassering no por carg'e den e proyecto y nan ta mand’e toch na Ministerio Publico pa wak si tin un guia di Reclassering un tiki mas largo”, Pemberton a señala.
E trayecto ta cuater luna cu e hoben tin pa cumpli cu ne, pero tin cierto casonan cu nan ta haya cu mester di mas tempo.
“Bo ta wak e problema social hopi grandi cu ta desaroyando su mes mas y mas den un direccion negativo, anto e resultado ta cu e hobennan ta bin den problema cu husticia”, el a reitera.
Tambe el a comenta cu diferente factor ta pone e hobennan cu menos tolerancia pa loke ta termento-bullying, y hopi di nos hobennan ta wordo bullied, esey ta ripara masha hopi mes, y nan no sa con pa maneha esey.
