Un reconocemento importante pa e parti Caribense di Reino Hulandes
ORANJESTAD (AAN)/PHILIPSBURG: Durante e di 39 Reunion Anual di e Association of Caribbean Commissioners of Police (Asociacion di Hefenan di Polis Caribense (ACCP), cu a tuma luga di 12 pa 16 di Mei 2025 na Arthur Chung Conference Centre na Georgetown, Guyana, Comisario Carl John, Hefe di Cuerpo Policial di Sint Maarten y Presidente di e Colegio di Hefenan di Polis di e parti Caribense di Reino Hulandes, a keda scogi como prome Vice-presidente di ACCP.
Nombramento di Comisario John pa e funcion prominente aki den ACCP ta un gran reconocemento di su entrega y liderazgo, y un honor pa e region Caribense di Reino Hulandes. Esaki ta demostra cu e contribucion di e islanan na siguridad regional no solamente ta wordo aprecia sino tambe respalda activamente riba plano internacional.
ACCP, funda na 1987, ta uni Hefenan di Polis di mas cu 20 pais y teritorio den Region di Caribe. E organisacion ta stimula cooperacion, intercambio di conocemento y un acercamento conhunto contra e problema di crimen cu ta transcende frontera nacional. Tur e cuerponan afilia ta enfrenta reto similar: crimen violento, traficacion di droga, traficacion di hende, crimen cibernetico, problema hubenil y e impacto di desigualdad socioeconomico riba siguridad. Ademas, desaroyo di capacidad, digitalisacion di investigacion y fortificacion di “community policing”, tur ta hungando un rol cada bes mas importante den e debate regional.
ACCP ta hunga un rol fundamental den e structura di siguridad regional di Caribe. ACCP ta conta cu un red fuerte, basa riba promocion di confiansa mutuo, facilitacion di cooperacion den practica y intercambio directo di conocemento y experiencia. Sigur pa cuerponan mas chikito, cu hopi biaha ta carga responsabilidad grandi pero cu recurso limita, ACCP ta un plataforma di gran balor; no solamente debi na e laso cu coleganan den region, sino tambe pasobra e ta duna acceso na experticio, formacion y representacion di interesnan comun.
Tema di e conferencia “United in Action, Transformed in Purpose: Building an Integrated Caribbean Security Architecture” (Uni den Accion, Transforma den Proposito: Construyendo un Arkitectura Integral di Siguridad di Caribe) ta enfatisa e necesidad pa mas cooperacion integral y transfronteriso.
Den luz di esaki, eleccion di Comisario John tin un balor simbolico tambe: como Hefe di Cuerpo di un isla cu tin laso estrecho cu tanto e structuranan di siguridad Caribense como esnan Hulandes, e por aporta cu capacidad pa crea brug y experiencia internacional. Como prome Vice-presidente, Hefe di Cuerpo Policial John lo duna un aporte na e rumbo y toma di decision denter di ACCP y lo yuda fortalece e cooperacion entre e estadonan miembro.
Nombramento di Comisario John no ta un casualidad. E conoce ACCP bon, sa kico cooperacion ta nifica realmente den practica y por papia cu autoridad tocante e realidad di cuerponan policial mas chikito.
Como Hefe di Cuerpo di Polis di Sint Maarten y Presidente di e Colegio di Hefenan di Polis, e ta aporta experiencia relevante pa e temanan actual den e region. P’esey, por consider’e un representante di peso y envolvi na e nivel aki.
