Problema cu motor nobo RECIP-4 na WEB a pusha Aruba den blackout total

E sistema automatico costoso pa evita esey no tabata disponible

• Pa colmo e Turbina di Gas tambe ta fo’i servicio
• Proceso transitorio pa elimina tur Boilers na Aruba 

ORANJESTAD (AAN): E deseo di WEB Aruba NV ta simple!  Nan kier elimina tur e sistema di Boilers y vapor cu Aruba tabata usa desde mey-mey di siglo 20 pa genera coriente.  Tur hende ta corda e dolornan di cabez cu Split-Tube y blackouts den decada di 1970 y 1980.

   Ora cu e compania di Finlandia, esta Wärtsilä a perfecciona e motor tipo reciprocating (yama tambe RECIP) pa produci coriente, esaki a hala atencion mesora di WEB Aruba NV.  Asina Aruba a negosha y a adkiri e prome motor RECIP.  Esaki ta un forma directo pa reemplaza e sistema di Boiler pa genera coriente.

   RECIP ta bira e Boiler-Killer: Sinembargo DIARIO ta corda ainda con a emiti varios advertencia, riba cierto peligronan cu e prome motornan RECIP tabata notorio pe, esta cu cualkier descuido cu e combustible, e lo por ocasiona candela.  Danki na e experiencia aki, tanto Wärtsilä y WEB Aruba NV a logra di mehora e proceso pa reduci cualkier chens pa candela, y reduci tur ‘down-time’ cu e motornan.

   Desde e tempo ey, e motornan RECIP a funciona formidable na e planta di WEB Aruba NV, te cu a manda busca mas.  Djis pasobra e ta usa combustible hopi mas eficiente, casi no ta gasta demasiado fuel oil (compara cu e Boilernan), y cada version nobo di RECIP ta mucho mas eficiente cu esun prome.

   Algun aña pasa, Gobierno y WEB Aruba NV a anuncia cu nan lo bay construi un planta grandi mas na Balashi, y esey lo bira e RECIP Phase IV, cu lo bay yuda genera 100 MW di coriente pa Aruba.  E planta aki lo bay yuda elimina tambe e plantanan antiek di Boilers y ta bisa asina ‘ayo’ na vapor y steam.

   Periodo di transicion: Durante recien lunanan, e trabao di construccion di e planta nobo di RECIP 4 a keda cla, y trabaonan ta sigui pa asina sigui cu e plan pa lanza e operacion di e motornan nobo di RECIP di Fase IV pa bira stabil, y asina bay elimina uno-pa-uno e Boilernan cu tin.

   Director di WEB Aruba NV, Alfredo Koolman durante un conferencia di prensa, a bisa cu e periodo di transicion aki ta uno caminda ta pone extra atencion na e operacion, eficiencia, y cualkier dificultad cu e motornan aki ta presenta cune.

   Recien ya caba esaki a produci un problema, y nan a fix esey.  Pero Dialuna marduga pa 4:45 am un otro problema a presenta na e RECIP-4 aki y a trip e sistema di coriente.

   Pa malasuerte, e sistema costoso automatiza ultramoderno cu WEB Aruba NV a cumpra na comienzo di decada di 2000 pa evita cu 1 solo storing ta benta Aruba plat, no tabata disponible pa e planta di RECIP-4 aki.

   Esey a trece como consecuencia, cu tur e kabelnan di NV Elmar a cay afo, y Aruba a bay den blackout.  Esey a laga e planta di WEB tambe na Balashi den scuridad.

   Turbina di Gas tambe ta offline: Pa colmo, e tan gusta Turbina di Gas cu ya pa hopi aña a sirbi como e salbabida di Aruba, pa asina e wordo cendi rapidamente bek pa asina suministra coriente na Aruba, tabata for di servicio.

   Esey ta loke Koolman di WEB Aruba NV a confirma.  Henter e Turbina di Gas ta ricibiendo un ‘service’ e simannan aki, pasobra e mester ta bek riba standby na comienzo di September.  Como cu e prome dos siman di September, historicamente ta e simannan unda e uso di coriente ta mas ‘piek’ na Aruba.

   Pues, Aruba no por a haya coriente mesora bek debi cu e Turbina di Gas ta desmantela.  Segun Koolman, mesora e personal na planta a cuminza traha pa recobra coriente bek, pero simultaneamente trata na haya mihor bista di situacion.  Hunto cu NV Elmar a haci esfuerzo pa recupera suministro di coriente, y dos ora despues a cuminza manda coriente bek den pueblo.

   2do Blackout di Dialuna: Varios bario a cuminza haya coriente bek, pero e habitantenan a ripara cu e luznan den cas ta fluctua bastante.  Iluminacion ta bira ‘hopi cla’ y despues di un rato ta ‘hopi scur’.  A resulta cu voltahe di coriente ta subi/baha na forma espantoso.  Hopi hende a core saca plug di nan artefacto electrico e momento ey, y a paga nan airco pa evita cu e fluctuacion di voltahe, cu tabata varia di 98 Volt te cu 122 Volt no causa daño na cas.

   Esaki ta e motibo cu na WEB Aruba NV a topa cu mas problema, y a causa e di 2ndo Blackout di Dialuna, banda di 8:00 am.

   Segun Koolman, aki a bay atrobe den di dos intento di busca forma pa recobra coriente.  Y cada biaha ta determina e origen di problema, pa nan por atende na un forma responsable, y sigui traha riba e re-suministro.

   E Director di WEB Aruba NV a bisa cu e prome Blackout, nan tin un bon bista pa e origen di problema.  E di dos Blackout, nan a pinpoint esey na e situacion instabil den planta.

   Seis ora largo di Blackout: Alfredo Koolman a mustra cu ora e 2ndo Blackout a manifesta su mes, e ora ey si pa 8:00 am nan a dicidi na tuma tur nan tempo pa realmente determina kico ta causante di e problemanan.  Unavez cu a determina esey, e personal gradualmente a keda re-suministra coriente cu mas cautela.

    Esey a pone cu finalmente, pa 11:10 am, henter e isla tabata bek riba red di coriente.  Casi 6 ora di Blackout cu lo bay bira tema di diferente rapport y investigacion interno cu lo wordo haci.  Aki sigur e fabricante Wärtsilä ta interesa tambe pa haya sa kico a causa tur esaki.

   Claro por mira cu ta un combinacion di diferente factor cu a pone Aruba pasa den un mainta scur, unda algun caminda a keda sin awa.  E fase di transicion pa motornan nobo di RECIP-4, e hecho cu e Sistema Automatico pa evita Blackout no tabata disponible pa procesa coriente di RECIP-4, y pa super mala suerte e Turbina di Gas tambe tabata cu vacacion.

   Director di WEB Aruba NV a ofrece disculpa, y a bisa cu ta haya lamentable cu tin incidente ta socede cu Blackout, y nan sa cu e tin impacto grandi riba comunidad.  “Nos ta conciente di esey.”  El a bisa cu personal di e compania a traha cu alma y cuerpo, haciendo nan esfuerzo pa e periodo sin coriente a keda mas cortico posible.

  Unavez cu e motornan RECIP-4 opera full bon completamente, y elimina e Boilers... WEB Aruba NV lo bay spaar 25% di combustible.