Segun Luis Oduber di WEB Aruba NV - *Pa 6:24 pm Aruba tabata den un 'blackout' completo
ORANJESTAD (AAN): Diasabra atardi, varios bario rond di Aruba a cuminsa experiencia problema cu coriente. Un rato despues, e problema a bira mas grandi y WEB N.V a anuncia un 'blackout' na Aruba.
Henter Aruba a keda sin coriente. Na prome instante a indica cu a identifica e fayo, pero e situacion a bira mas serio y e problema a persisti te den oranan di madruga.
Algun bario a haya coriente bek despues di algun ora durante diasabra anochi. Otronan a haye mas laat banda di 1 am y tambe tabata tin barionan cu a haye y pa despues bay bek.
Diadomingo atardi, gerencia di e compania di utilidad a yama un conferencia di prensa pa asina anuncia den detaye kico a sosode y pakico Aruba a keda den total scuridad.
Luis Oduber, Director di WEB Aruba NV acompaña di Richard Frank, Hefe di Produccion; Francis Ras, Hefe di Sector di Mantencion; Randolph Ruiz, Director Financiero y Jozef Everon, Hefe di e Sector di Asuntonan Operacional Tecnico.
Oduber a expresa na prome lugar palabranan di disculpa na comunidad pa e sucedido di diasabra. Aunke e tabata algo fuera di nan alcance, el a bisa cu ta deber di e compania pa expresa palabranan di disculpa.
El a bisa cu como team nan a logra traha duro pa restablece coriente pa Aruba por a sigui gosa di e servicionan.
Kico a sosode? E director di WEB Aruba NV a laga sa cu diasabra rond di 3:10 pm, operadornan di central a haya un melding di storing di boiler #3. Na e momento ey, nan a start e gas turbine cual ta e turbina cu e compania tin riba diesel pa emergencianan. A haci esaki como precaucion den caso cu algo pasa cu e boiler.
E boiler a stabilisa y a sigui core normal y e alarma a 'clear'. Pa mas o menos 4:20 pm, a paga e gas turbine y e operacion a keda stabilisa.
Oduber a lamenta cu pa mas o menos 4:45 pm, e mesun boiler a 'trip'. E ora ey, e presion di e steam a cuminsa cay afo y otro boiler, esun number 5 tambe a cay hunto cu ne.
Consecuentemente nan operadornan den central, pa purba stabilisa e sistema, a schaakel uit, e 'feedernan' mayor cu ta bay pa Elmar. Den e caso aki Elmar 5 y Elmar 6 ( cu ta den area di Paradera, Playa, Wayaca) a wordo saca for di servicio pa purba stabilisa e sistema den central cu ta algo normal ora cu kier stabilisa, a splica.
Banda di 4:50 pm, a saca esakinan for di servicio y pa mas o menos 5 pm, a bolbe start e gas turbine pa asina por a bolbe stabilisa e sistema y wak kico tabata e problema cu e boilernan.
Luis Oduber a laga sa cu 2 minuut despues un di e motornan di RECIP tambe a cay afo y pa bolbe trece stabilidad mester a saca afo e Elmar 1 (area di Santa Cruz).
Banda di 5:45 pm tur cos a mustra cu tabata tin suficiente capacidad, cu e sistema a stabilisa caminda cu operadornan a cuminsa suministra coriente bek riba Elmar 5. Un rato despues, mientras cu tabata haciendo esfuersonan pa stabilisa tur cos y pa sigui restablece coriente pa e resto di 'feedernan', esta Elmar 5, 6 y 1, a haya un problema cu boiler #6, cual tabata e unico cu a keda ariba cu tambe a 'trip'. Esaki kiermen cu tabata tin 3 boiler for di servicio y un motor for di servicio, a indica.
Esaki ta nifica cu tur turbina cu tabata riba linea a cuminsa bay for di servicio pa proteccion di nan mes poco poco a drenta den un blackout pa 6:24 pm
