Inicialmente esaki tabata poni pa aña 2023 - ORANJESTAD (AAN): CEO di Oficina di Turismo, Ronella Croes a duna di conoce cu pa loke e cifranan di turismo di e luna di Juli, ta spera un total di entre 91.000 y 92.000 bishitante, primordialmente di Merca.
Ta mira un continuacion di e adelanto di loke a mira den e ultimo lunanan, sigur for di Maart, pa loke ta trata e luna di Juli, Croes a indica.
Mirando e proyeccionnan, por bisa cu pa e di cuater kwartaal di e aña aki, Aruba lo ta mirando un 100 % di recuperacion di cantidad di turista, compara cu aña 2019, e mesun kwartaal.
Ronella Croes a agrega cu ta avansando y ta mira un adelanto cada kwartaal y esey ta locual ta den e proyeccion aworaki.
Cu esaki por bisa cu na 2022, Aruba lo ta mirando un recuperacion di 100 % di turista compara cu aña 2019. Inicialmente esaki tabata poni pa aña 2023 bay dilanti.
E adelanto aki ta hopi remarcabel y ta sigui subraya cu Aruba ta keda recupera na un velocidad mas halto cu otro paisnan of islanan den e region, a bisa.
Oficina di Turismo ta trahando riba plannan, proyeccionnan y presupuesto pa aña 2022 y lo ta un aña di crisis ainda y tambe un aña cu kisas otronan ta bin bek den normalidad. "Aworaki ainda nos tin un Aruba cu ta beneficia di nos mesun strategia, nos mesun exito, pero banda di esey tambe di mercadonan cu no ta habri tampoco, entre otro Europa", a señala.
Pa otro aña ta anticipa cu mercadonan lo ta habri atrobe. Nan lo tin e virus bao di control y esey ta nifica tambe mas competencia y un grado di normalidad den lo ta trata e spectrum di turismo y locual mester tene na cuenta, CEO di ATA a declara.
Tur esey ta wordo teni na cuenta pa loke ta trata e plannan pa 2022 y tambe ta tene cuenta cu e hecho cu net prome cu e crisis tabata tin hopi otro topiconan cu tabata prioridad den e agenda di hopi destinacion. Ta cosnan cu ATA lo trece dilanti ora di trece dilanti e plannan y presupuesto pa aña 2022, Ronella Croes a duna di conoce.
