Pro Juventud Savannah a hiba hobennan di Noord dal un keiro

ORANJESTAD (AAN): Pro Juventud Savannah a organiza, prome cu scol cuminsa, un trip den bus pa mucha- y hobennan di 5 aña te cu 15 aña.

Pro Juventud Savannah ta un organizacion di e bario di Noord. En total a participa 41 mucha- y hoben y tabatin 5 lider.

   E trip den bus a tuma lugar, diahuebs ultimo, 12 di augustus 2021 di 8:30 di mainta te 1:30 di merdia.

   E trip den bus di Fofoti a sali di Pro Juventud Savannah. Prome a bay kapel di Alto Vista (algun mucha ainda no conoce), a sigui pa e ruina di Bushiribana (algun mucha nunca no a subi te na halto y e biaha aki si nan a subi te na halto aya), despues a bay Biblioteca Nacional San Nicolas, unda a worde ricibi door di Judith y Mirla, kendenan a duna un ‘rondleiding’, un splicacion di BNA, con ta fia buki, cuanto e ta costa, nan por a coy buki y lesa buki un rato.

Tambe e mucha- y hobennan por a mira e video y exposicion interesante di “Caribbean Ties - Conexion Caribense” cu ta ainda na Biblioteca Nacional San Nicolas. Ta recomenda tur hende pa bay mire.

Despues hunto a bay Wendy’s pa 12:00 pm. Pa 13:15 pm a sali for di Wendy’s pa yega 13:30 back na Pro Juventud Savannah.

   Na yegada na Pro Juventud Savannah e mucha- y hobennan a haya un ziplock cu articulonan di scol y bukinan regala door di UNOCA.

   Directiva di Pro Juventud Savannah ta gradici tur mayornan, e lidernan, e muchanan, e hobennan, Cede Aruba cu a duna e sosten financiero pa por a realisa e trip den bus, UNOCA cu a regala e bukinan pa regala e mucha- y hobennan y Biblioteca Nacional San Nicolas.   Pa esey nan ta bisa masha danki.

    E Mucha- y Hobennan a pasa un dia feliz y ta hopi agradecido pa e bunita y dushi dia aki. Mayornan tabata feliz y Lidernan ta contento y satisfecho cu e trip den bus a bay bon y a caba bon.