ORANJESTAD (AAN) Directora di SKOA, señora Anuesca Baly, a indica den entrevista cu DIARIO,
cu manera ta conoci Minister di Enseñanza a acorda pa baha e cantidad di alumnonan den klas na 24. Baly a indica cu tin muchanan cu algun tipo di limitacion, manera autismo, cu tambe tin un lugar na SKOA.
“Mester tene na cuenta cu hopi biaha muchanan cu ta autista, pasobra tin diferente tipo di autismo, no ta tur por ta den un scol regular. Pero tin muchanan cu ta autista cu si por ta den un scol regular, y tin biaha nan tin leerling asistent cu nan.
“Den nos caso, tin muchanan cu hasta tin limitacion di bista, muchanan cu ta den rolstoel; muchanan asina tambe ta wordo acepta den nos scolnan pasobra nos ta trata e muchanan cu inclusividad”, señora Anuesca Baly a señala.
El a agrega cu ora ta trata di un mucha cu tin un spectrum mas severo, hopi biaha nan ta wordo getest door di un instancia y nan ta bay otro tipo di enseñanza cu ta mas adecua pa nan.
“Pasobra, nos ta boga si semper pa e mucha ta na un scol unda ta adecuado p’e. Pasobra nos prioridad ta pa e mucha siña den un ambiente adecua p’e”, señora Baly a acentua.
P’esey ora un mucha asina wordo getest di parti di cuido hunto cu trahadornan social, y tur cu ta envolvi, ta papia cu mayornan y guia nan pa laga e mucha bay un scol cu ta fit p’e, señora Anuesca Baly a señala.
