Monique Giel-Labad di WGK:
ORANJESTAD (AAN): Señora Monique Giel-Labad, Enfermera profesional y Tienermoeder di Wit Gele Kruis, a menciona den entrevista cu DIARIO cu mayornan ta tuma contacto pa busca informacion, pero e ta ripara cu tin mayornan cu ainda tin tabu riba e tema di sexualidad.
Esaki den sentido cu si e mayor tin un yiu muher cu tin un amigo, pa e mayor nada ta bay pasa, pasobra e ta papia hopi cu su yiu muher y e no ta bay haci nada.
“Nos ta wak den practica cu mayor ta permiti e mucha homber drenta camber di e yiu muher, nan ta bisa cu nan ta den sala y cu nan ta tira bista. Pero nos a haya casonan unda di un situacion asina, a resulta un embarazo.
“E ta bon pa touch, pa nos ta keda informa mayornan, kico ta e ultimo trendnan. Pues, den cada fase bo ta haya trendnan nobo cerca e hobennan, y eynan ta na unda nos ta trek e mayornan, por ehemplo, durante e charlanan of ora nos ta duna anochinan informativo pa mayornan, nos ta stress hopi riba e parti aki”, Monique Giel a menciona.
El a informa cu otro siman lo tin anochi informativo pa mayornan cu nan yiunan ta bay participa den e proyecto “Biba Amor” y eynan ta bay enfoca riba kico ta e temanan cu ta bin mas padilanti, bao e hobennan.
“Cu ta e parti di abuso sexual, anticonceptivo, ongesteld, cu tambe ta un tema cu e muchanan muher ta trece padilanti, pasobra nan ta haya nan menstruacion, pero nan no tin informacion kico ta pasa cu nan curpa, ki ora nan por sali na estado, con e proceso full ta bay” Monique Giel-Labad a relata.
