Na caminda pa un Parlamento y Gobierno cu caranan y idea nobo
*Kico Gobierno Rutte a planea pa Aruba tambe prome cu su caida?
*19 di September RAft mester ta parti di maneho presenta pa Rey?
ORANJESTAD(AAN)—Caranan nobo ta presenta nan mes diariamente na firmamento politico Hulandes, cu a cay den situacionnan sumamente serio.
Den e mundo politico mes ta wordo papia di turbulencia serio y situacionnan cu a haci cu cantidad di figuranan politico Hulandes a dicidi cu ta mihor bandona politica.
Prome cu November yega su final, Pueblo Hulandes lo dicidi kende lo forma parti di su Parlamento, su Tweede Kamer y asina tambe e proximo Gabinete cu mester traha riba e futuro di Hulanda pero tambe di Reino.
September 2023 lo trece un momento importante, cu ta e momento cu Gobierno di Reino lo mester presenta su Miljoenennota 2024, su Presupuesto 2024 y su Plan di Belasting na Parlamento Hulandes na inicio di e aña nobo di gobernacion Hulandes.
“Prinsjesdag”ta e nomber cu a wordo duna na e dia cu ta bini hunto pa asina scucha di Rey Willem Alexander kico tin prepara pa Hulanda pero asina tambe pa e relacion financiero cu islanan Hulandes den Caribe.
Ministro Alexandra van Huffelen den esaki lo hunga un papel importante pasobra ta e mester prepara e partinan cu lo bini dilanti di parti di Gobierno Hulandes ariba relacionnan den Reino y sigur e relacion financiero, cu RAft a pone den ambiente di tension.
RAft ta e ley cu Hulanda kier uza pa asina sigura cu ta Gobierno di Reino, den cual Hulanda tin e gran mayoria, tin supervision riba e maneho financiero di Aruba.
Esaki manera na diferente ocasion a bini dilanti ta directamente mishi cu e actual areglonan legal ta provee pa loke ta trata e papel di Parlamento di Aruba den decisionnan cu mester wordo tuma pa Aruba.
Manera ta conoci, Ministro Alexandra van Huffelen a pone exigencia pa Aruba atende cu RAft pa asina por alcansa un acuerdo pa e prestamo pa e 500 Miyon pa asistencia financiero pa e periodo di Covid-19 prome cu Dia Prome di September.
Mientras Aruba ta para riba un ley cu ta regla e supervision pa medio di un ley di Aruba, Hulanda kier un Ley di Reino, cu ta e RAft.
E proximo simannan aki ta bira hopi interesante pasobra manera ya bisa, e entrega di e Miljoenennota, pues e relato financiero pa 2024 di Gobierno Rutte na Parlamento Hulandes riba Prinsjesdag, lo nifica cu splicacion lo wordo duna tambe di e pasonan cu Gobierno Hulandes kier tuma a base di su relacion cu e otro paisnan den Reino, manera Aruba.
E momento cu Gobierno di Reino pa medio di Rey Willem Alexander presenta su plannandia 19 di November, e tercer Diamars di September 2023 na Parlamento Hulandes, e evento pues cu ta similar na apertura di Aña di Parlamento di Aruba riba e segundo Diamars di September 2023 na Aruba, e lo papia di e plannan cu Gobierno demisionario di Rutte a prepara pero cu awor mester wordo adopta na cierto forma mientras Hulanda lo conoce un Gobierno cu chens grandi di cambio.
Esaki ta e preocupacion. Te awor den tur loke e partidonan a trece dilanti, poco por wordo scucha di loke realmente nan tin na bista pa Aruba.
Informacionnan di por ehempel cu BoerBurgerBeweging, cu ta wordo considera un partido importante den e eleccionnan venidero, ta poco pero si ta duna indicacion manera DIARIO ya a informa, di traha na interes di e Hulandes cu ta biba na Hulanda, loke ta nan deber.
Importante ta bira e opinion di Pieter Omzigt, cu tabata miembro di CDA y awor kier bini cu su propio partido. Pronosticonan ta bisa cu si esaki bira realidad, Hulanda mester ta prepara pa un sorpresa electoral.
CDA na su turno ta bay eleccion cu Henri Bontenbal como lider. Rob Jette lo dirigi partido D’66. . Dilan Yeşilgöz-Zegerius lo sigui Mark Rutte como lider di VVD mientras cu Partij van de Arbeid ta mira Timmermans como su propio dirigente.
DIARIO lo bini cu e lista oficial di e figuranan nobo na Den Haag, cu lo mester tuma rienda di futuro den nan man despues di eleccion.
Ta na e Gobierno Hulandes nobo cu lo wordo eligi dia 22 di november proximo pa dicidi kico lo bay pasa y kico lo resta di e plannan cu ta wordo presenta riba Prinsjesdag dia 19 di September na Parlamento Hulandes den e Miljoenennota, 2024, cu Rey Willem Alexander lo presenta.
Cierto informacionnan a cuminsa mira luz y DIARIO lo informa Aruba debidamente di tur informe cu lo drenta.
Sigur ta cu despues di vacacion 2023, un tempo intenso ta cuminsa pa Aruba, Reino y mundo en general.
