Dia 12 di September 2023 berguensa Avestruz ta continua den Corte
*Benny lo por asisti na Ceremonia y despues bay Corte cu abogado?
*Parlamento mester refleha e rechazo di crimen y defende Pueblo
ORANJESTAD(AAN)— Dia 11 y 12 di September 2023, Corte di Husticia ta duna inicio na e casonan den apelacion contra e sentencia di Huez den e caso Avestruz manera trata den Corte di Prome Instancia.
E acusado den e caso aki, cu a wordo pinta como e araña den e neishi, ta Miembro di Parlamento di Aruba, Benny Sevinger.
12 di September 2023 lo bira un dia historico pasobra ta riba e segundo Diamars di September, ta observa inicio di Aña Nobo di Parlamento y Gobernador na nomber di Gobierno ta pronuncia na Parlamento, e planan pa goberna Aruba.
No ta conoci si Benny Sevinger mes ta bay sala di Corte e dia ya cu ta trata di un session Pro Forma pa establece fecha di su caso den Corte.
En todo caso e ceremonia den Parlamento, caminda e lo representa Aruba lo ta mainta, loke ta haci posibel pa merdia Benny Sevinger atende cu Corte di Husticia.
Benny Sevinger ta drenta historia como e persona central den e jugada di Partido AVP y sigur e figura di Mike Eman, pa exigi pa Pueblo di Aruba bay contra su principionan halto di moral y haci posibel pa Aruba vota pa un persona cu tabata deteni den prison.
Graba ta keda den historia di Aruba e momento cu a bira conoci, cu Benny Sevinger cu tabata detene den prison, lo a subi lista di AVP cu a conoce un campaña politico special pa Benny Sevinger por a wordo eligi como representante di Pueblo di Aruba como prisonero.
Historia di Aruba a wordo mancha cu e realidad, cu un persona persigui pa Husticia den uno di e casonan criminal mas espectacular cu Aruba a conoce, a presta huramento como Miembro di Parlamento di Aruba, den uno di e casonan mas grandi cu Aruba a conoce sigur pa loke ta trata e cantidad di personanan cu a wordo persigui.
Si no tabata pa Gobernador di Aruba, Benny Sevinger lo a presta huramento como Miembro di Parlamento di Aruba, como persona den detencion preventivo cu tur bochorno cu esaki lo a nifica pa Aruba.
Den seno di AVP e opinion tabata cu ta sentencia di Huez mester pone fin na estadia di un Miembro di Parlamento acusa di a comete un crimen.
Huez a papia. Benny Sevinger a wordo condena pero pa Mike Eman y partido AVP, Huez a duna un sentencia pa un estadia corto den prison y ni kiebra di AVP por a prevenia, cu Benny Sevinger te awe ta Honorable Miembro di Parlamento di Aruba, representante oficial di Pueblo di Aruba.
Mientrastanto uno di e temanan importante cu Parlamento sigur mester atende ta crimen, cu ta e palabra cu a perde su importancia den e libreto general di un mundo, caminda forsa di violencia y criminalidad, ta kibra e basenan mas sagradi di un Pueblo cu ta e moral y e pakete di balornan di Pueblo.
Criminalidad ta un acto contra hende. Criminalidad ta un acto castigabel, cu ta destrui felicidad y bienestar di hende y manera ta pasa na nivel mundial, di henter mundo.
E proceso democratico den cual Parlamenta ta central, ta proteha Pueblo di abuso y situacionnan serio y castigabel cu ta desaroya.
Durante ultimo lunanan por a mira casonan grandi na costa di Aruba cu ta bay contra seguridad di e pais y trankilidad di e ciudadano.
Gobierno y Polis ta traha incansabel den un mundo cu sigur ta exigi representantenan di Pueblo sigui discuti kico ta criminalidad y tur loke ta relaciona cu esaki.
Awor e pregunta grandi ta bini dilanti. Con Benny Sevinger por bay atende criminalidad den Parlamento?
Criminalidad ta un acto contra e normanan y balornan halto cu Parlamento mester presenta na Pueblo pa asina sostene e base di democracia cu orden, decencia y husticia.
Con sigur den e situacion mundial di horor cu ta trapa riba norma, Benny Sevinger por atende asuntonan di Husticia despues cu e ta exigi pa Pueblo di Aruba wordo representa pa su persona den Parlamento despues cu sentencia di Huez a manda su persona prison?
Con Benny Sevinger por lanta para den Parlamento?
Con Benny Sevinger por papia di medidanan cu mester wordo tuma si el a sigui gosa di un entrada den Parlamento, pa cual Pueblo mester paga mientras sentencia di Huez no a papia solamente den castigo di prison pero tambe e hecho cu e no por ta den Parlamento y funcion publico?
Kico tabata e motibo cu no tabata tin hende pa reemplasa Benny Sevinger riba lista di AVP sigur te e momento cu Huez por a declara tur acusacion falso, si Benny tin razon?
Pregunta y mas pregunta den un situacion historico di berguensa.
