Hopi pasahero no kier subi barco mas na Miami ni Puerto Rico...
ORANJESTAD (AAN): E noticianan cu a circula tur caminda, unda bo ta mira con na Miami e oficialnan di ICE ta hasta bay abordo di barconan crusero, pa asina detene pasahero... tin hopi hende cu temor di viaha pa Florida pa subi barco crusero.
E cantidad di viahero for di Europa pa Florida a cay drasticamente. Mesun cos ta pasando cu Canadesnan, cu ya no ta viahando mas pa Merca, principalmente pa Florida ni pa Arizona mas. Nan tur tin temor di wordo humiya, interoga pisa, y deteni door di Inmigracion Mericano prome cu nan sali pa nan crusero cu ta sali sea di Miami, Fort Lauderdale, Port Canaveral, of hasta for di San Juan (Puerto Rico).
Pesey awor ta diferente compania crusero ta buscando otro waf pa start cu nan viahenan crusero. Algun ta saliendo awor for di Colon (Republica Dominicana), tambe for di Willemstad (Curaçao), y tambe awor tin mas saliendo for di Bridgetown (Barbados).
Den fin di siman, e compania Princess Cruises tambe a uni su mes na e otronan cu ta uzando homeport diferente.
Nan a haci esaki, debi cu demanda pa viahenan crusero cu no ta sali for di Merca ta subiendo drasticamente. E cantidad di pasaheronan cu ta aborda na Miami ta cayendo rapidamente.
Ademas di esey, e viahe for di Barbados lo duna e pasahero mas chens di bishita mas isla riba un itinerario mas cortico, compara cu viahenan cu ta sali for di Florida.
E bon ta cu Barbados ta un isla cu tin masha hopi vuelo direct for di Merca, for di Canada, y for di Inglatera y demas paisnan di Europa.
Princess Cruises a indica cu nan ta cuminza uza Barbados como homeport pa expande nan programa di Southern Caribbean, pa aña 2027 y tambe 2028.
Nan lo tin 30 viahe den Southern Caribbean, cu e barco Crown Princess cu ta nabega for di Januari te cu Maart 2027, y e barco Emerald Princess cu ta nabega di November 2027 te cu Maart 2028. Bo por escoge di viahenan di sea 6-anochi of tambe di 9-anochi, pero mayoria di nan lo ta di 7-anochi.
Tin hopi critica caba riba e viahenan nobo aki di Princess Cruises, pasobra aunke nan ta sali for di Barbados, nan a opta pa inclui un bishita na San Juan (Puerto Rico), y hopi pasahero no a gusta esey. Pasobra den waf di Puerto Rico tambe tin oficialnan di ICE ta controla, y esaki ta algo cu pasaheronan ta evitando tur e temponan aki.
