SVT ta duna nan un di dos oportunidad den bida
ORANJESTAD (AAN): Prome Minister di nos pais, Mike Eman ta felicita e 3 hobennan cu diaranson a termina e programa di Formacion Social (SVT) despues di un aña di perseverancia y dedicacion y alavez ta invita tur hoben cu ta den un situacion cu pa un of otro motibo no ta bay scol mas of ta den un situacion dificil den bida, pa haci uzo di e oportunidad y inscribi pa e siguiente programa cu lo cuminsa na augustus proximo. Ta trata aki di Leonardo Gomes Reyes, R.R. Maduro, y Alexander Dorotaal.
E mandatario a expresa cu hopi biaha hobennan ta yega na un fase di nan bida na unda nan no sa unda pa bay, si nan ta sigui studia of bay traha. Hopi ta cay den un periodo di e pensamento mas profundo den e curso di nan bida y esaki ta e momento unda cu nan por desvia. Y aki ta e momento cu nan mester di algo na tempo pa evita cu nan ta desvia y bay den mal caminda.
“Esaki ta e momento husto na unda e programa Formacion Social ta duna un man y habri porta pa e hobennan aki cu ta den buskeda”, Prome Minister a enfatisa.
Prome Minister Eman a expresa cu e ta contento di tende testimonionan positivo di hobennan cu a participa den e programa di SVT despues cu nan tabata bayendo den mal direccion, awo a haya otro miras riba bida. E testimonio di e exito aki ta grandi. Algun hoben a drenta mercado laboral cu exito, y algun otro hasta a drenta Arumil.
E prome lunanan di e programa di SVT, e hobennan ta haya un curso hopi intensivo di disciplina cu ta cambia nan bida y pone sintido di responsabilidad y di compañerismo den nan.
Prome Minister a gradici Marina Real, Arumil y SVT pa nan determinacion pa yuda nos hobennan y guia nan pa un miho futuro. “SVT ta un trayecto na e momento husto den nan bida na unda pa un rato nan tin mester di un instituto den nan bida cu ta duna nan un di dos oportunidad den bida. Nos ta contento cu e programa aki y nos ta spera cu e lo tey pa semper”, Prome Minister Eman a expresa.
