Mundo ta sigui vigila causante di miedo pa inflacion 2023
*Mundo ta vigila deflacion na gigante economico na Asia
ORANJESTAD (AAN)- E segundo siman di Augustus 2023, ta cera cu mundo pendiente di e desaroyonan economico den cual e prijs mundial di petroleo ta central.
Prijsnan mundial di petroleo a sigui exigi tur atencion ayera ora paisnan di OPEC mantene nan mes na casi 90 Dollar pa baril.
Prijs di petroleo di entre otro companianan Mericano, Britanico y Emiratonan Uni di Arabia, a mantene nan mes riba 80 Dollar pa baril.
Kico esaki lo nifica pa e consumidor na entre otro Aruba den futuro directo, a bira visibel den e prijs mundial di gasolin ayera cu a yega casi 3 Dollar.
Informantenan a mustra DIARIO cu proyeccionnan mundial ta cu prijs di petroleo lo por sigui subi y hasta aumenta na 2024.
E medidanan cu a wordo tuma mundialmente pa baha e uzo di petroleo y e forma cu ta papia di combustibel limpi cu lo ta conkista mercado, segun informantenan ta haci cu consumidor den hopi instancia no ta na haltura di loke por pasa cu e prijs di combustibel cu por lo pronto lo sigui domina sigur trafico riba careteranan, aunke medidanan pa baha emision ta wordo tuma.
E situacion mundial economico ta wordo vigila pa DIARIO na un di e momentonan mas impactante di 2023 ora tambe e Guera di Ukraine ta conoce inversionnan nobo di diferente pais y asina ta haya mas y mas e aspecto di un confrontacion mundial cu resultado directo pa economia mundial.
Importante ta sigur e hecho cu deflacion a haci su entrada na e gigante economico na Asia, caminda prijsnan a baha considerablemente loke segun analistanan economico cu ta informa DIARIO mester wordo vigila.
Deflacion ta nifica cu prijsnan na un pais ta baha y ta afecta economia di e pais loke tin su resultadonan pa mundo, sigur ora ta trata di un pais cu por wordo considera gigante economico cu a impacta comercio internacional.
Prome informacionnan ta indica cu e situacion aki por favorece otro paisnan grandi den un economia mundial, cu sigur pa Aruba cu ta depende di importacion y turismo ta sumamente importante.
