Morto y destruccion por culmina awe pa Pueblo di Ukraine --- *Fondo Monetario IMF ta considera guera un temblor mundial --- *Prijs di petroleo y gas ta bolbe subi den inflacion y angustia
ORANJESTAD(AAN)- Un siman nobo a anuncia su mes ayera pa un mundo marca pa incertidumbre, angustia y e realidad di un inflacion cu lo crea desaster social na cantidad di pais.
Fondo Monetario Internacional ta considera e guera na Ukraine como un temblor destructivo cu lo tin resultado serio mundialmente pero sigur na paisnan cu economia mas vulnerabel y chikito.
E crisis na Ukraine a bira un masacre di hende, mientras bomnan di Putin ta mata sin piedad na Ukraina mientras na Rusia mas y mas hoben ta trata na bandona nan pais.
Fondo Monetario Internacional a papia di e horor di guera, cu lo tin resultado fatal pa hende na paisnan pober y vulnerabel.
Prijs di cuminda lo conoce un aumento serio no solamente pa motibo cu prijs di petroleo y gas atrobe ta subi y asina ta bolbe causa aumento den e costo di bida.
Guera ta destrui camponan di trigo na Rusia y na Ukraine. Cu ta responsabel pa un gran parti di produccion agricola mundial.
Ayera e Fondo Monetario Internacional a lansa su preocupacion serio pa e forma cu mundo lo conoce e impacto di prijsnan di alimento cu banda di e victimanan di guera lo produci victimanan social na paisnan pober, caminda cuminda lo conoce prijsnan sumamente halto.
DIARIO a atende cu informantenan cu a splica cu e situacion mundial a bira mas serio ayera.
“Rusia a cumpli cu su menasa y avionnan supersonico tabata ataca Ukraine sin piedad y tabata mata habitantenan inocente. Esaki ta nifica cu ya no por papia di un confrontacion militar (entre dos ehercito) pero di un matansa,” informantenan a trece dilanti.
Loke ta pasa na Ukraine ta bay tin efecto grandi riba pobernan rond mundo, cu no tin placa pa paga nan pan di cada dia.
“Aruba mester tene na consideracion cu costo di bida ta sigui subi den un situacion di inseguridad total,” a wordo trece dilanti.
Ayera sigur informantenan no por a haci un pronostico di loke ta spera den e siman aki y mas bien a indica cu mester sigui e desaroyonan mundial continuamente.
“Mundo ta na guera, na cual Putin sigur lo no pone un fin y den cual e ta pone como unico salida, cu Ukraine ta entrega su mes loke lo nifica cu Putin por mata y destrui tambe tur persona cu e kier mata y destrui,” informantenan ta indica.
Na e momento aki mundo no por papia di un normal mas. E “normal” di ayera por lo pronto lo no ta conoci na mundo.
“Paisnan mester inverti cada rato mas y mas den un guera cu ta exigi arma y ta destrui e produccion normal di placa,” a wordo trece dilanti.
Cada dia cu pasa ta hiba mundo mas leu for di loke mundo tabata considera “normal”.
Informacionnan cu DIARIO a obtene ayera prome cu ciere di su edicion, ta mustra cu paisnan grandi ta tene na consideracion cu e siman aki por habri cu un aumento enorme di victimanan na Ukraine.
Manera nan a indica, mundo lo por biba uno di su momentonan mas scur cu atakenan mas pisa di Putin riba ciudadanonan na Ukraina cu no kier entrega nan pais.
