Pa consumidor e epoca despues di Pasco Grandi ta preocupante
*Rusia en espera di bishita di Nicolas Maduro na momento historico
*Prijs di petroleo por evita Biden cumpli cu amenaza contra Maduro
ORANJESTAD(AAN)—Celebracion di Pasco Grandi ta tras di lomba y mundo ta bolbe pa un realidad, cu por contene un shock pa e consumidor, mientras prijs di petroleo despues di Cuaresma ta subi manera un fli den biento di Cuaresma.
Kico lo spera e consumidor, cu a wordo dirigi den direccion di e pensamento, cu prijs di petroleo a baha y lo no afecta su cartera tanto?
Miembronan di OPEC tin nan propio opinion y ta mira un futuro briyante pa nan mes durante 2024 y 2025.
Segun informacionnan cu ta bini di OPEC, economia mundial lo sigui crece loke lo sostene un demanda mas grandi pa petroleo, cu ayera a bira atrobe uno di e problemanan mas importante cu ta spera e consumidor pero tambe tur loke lo ta resultado di e hecho cu e poder economico di e consumidor ta baha ora prijsnan subi hunto cu prijs di petroleo.
Ayera prijs di petroleo tabata rumbo pa 90 Dollar pa baril atrobe despues cu a optimismo di OPEC cu economia mundial lo crece cu 2.9 porciento na 2024.
Interesante ta awor kico e aumento di prijs di petroleo lo tin como resultado indirecto na un 2024 den cual accion politico ta culmina, manera DIARIO a anuncia, na e paisnan mas grandi debi na eleccionnan den cual e pensamento politico di publico na e paisnan concerni, lo bira sumamente importante.
Sigur pa loke ta trata Merca informacionnan internacional tabata indica cu por lubida cu Presidente Biden lo bolbe introduci sancionnan contra Gobierno di Nicolas Maduro na un momento cu tanto Biden como Maduro, mester enfrenta eleccion.
Pa Biden e lo ta poco mas dificil ya cu Biden ta biba na un pais democratico cu reglanan cu ta haci cu ta voz di Pueblo ta dicidi.
Pa Maduro eleccion ta un asunto cu e mes tin den su man ya cu manera a keda demostra, mundo liber por lubida cu eleccionnan na Venezuela lo no realmente liber.
Mientras Maduro a confirma su candidatura, poco ta keda di e compromiso cu e tabata tin cu Merca, cu eleccion mester ta limpi pa evita cu Merca lo bolbe impone sancionnan cu Biden a elimina.
Petroleo ta loke lo domina economia pero tambe asina e panorama politico cu mundo mester biba cune y cu lo ta decisivo pa tur consumidor na 2024.
Uno di e encuentronan sumamente importante sin duda lo bira, e bishita cu Nicolas Maduro tin planea pa Rusia, su aliado riba tereno di avance comunista y socialista pero tambe poder petrolero importante.
No mester lubida e lugarnan cu tanto Rusia como Venezuela ta ocupa riba tereno di productor di petroleo y e hecho cu mundo liber ta uza Venezuela pa evita compra di petroleo for di Rusia, cu asina a mira su economia seriamente afecta na momento cu e ta lanza su amenazanan di Guera Mundial den conflicto cu ta continua cu Ukraine.
Petroleo lo ta central den topico mundial den e proximo dianan cu mundo ta bandona e panorama di Pasco Grandi pa bolbe na normalidad cu lo nifica cu prijs di petroleo lo bira decisivo pa tur consumidor rond mundo.
Pa Aruba esaki ta nifica cu dentro di algun luna por mira con prijs di gasolin lo bolbe subi hunto cu tur loke ta depende di petroleo, den un economia mundial sumamente interesante cu DIARIO ta vigila pa informa su lectornan.
