Economia mundial mester wordo vigila hopi di acerca
Situacion mundial tenso riba tereno economico insigur
ORANJESTAD (AAN) Aruba mester sigui vigila desaroyonan mundial cu cualkier momento por nifica sorpresa.
Esaki ta informacion clave cu a drenta ayera den horanan di atardi ora e sucesonan riba mercado internacional di negoshi tabata wordo pa ultimo biaha scrutina pa DIARIO.
Advertencia di informantenan internacional a keda valido ayera atrobe ora prijs di petroleo cu a conoce un mehoracion leve siman pasa, a bolbe baha pa asina marca e realidad mundial riba tereno economico.
E caida di prijs di petroleo tabata directamente mara ayera na e miedonan cu tin pa e progreso di creacion di armanan nuclear na mundo y tambe e tarifanan cu a wordo aplica dor di Merca.
Den combersacion cu informantenan a wordo splica na DIARIO cu e situacion ta bira sumamente dificil pa paisnan cu economia habri manera Aruba y e forma cu importacion cada dia mester vigila e prijsnan cu ta wordo mantene.
Manera a wordo splica ayera, e prijs di petroleo Mericano a baha te alrededor di 62 Dollar pa baril mientras cu tambe azeta produci na otro partinan di mundo a conoce un caida di prijs.
Informantenan mundial clave ta mustra cu ta bira practicamente imposibel pa duna informacionnan importante adelanta riba curso di comercio mundial, loke sigur pa Aruba ta clave.
DIARIO ta den contacto pues cu fuentenan internacional cu a adverti cu na e momentonan aki publico y gobiernonan mester tene cuenta cu instabilidad mundial.
