Prijs di gasolin y diesel lo baha substancialmente entrante 10 di augustus

Minister Geoffrey Wever a confirma:

*Lo ta un reduccion di 42.5 cen pa gasolin y 34.2 cent pa diesel 

ORANJESTAD (AAN):   Dialuna mainta durante un rueda di prensa, Minister di Asunto Economico, Comunicacion y Desaroyo Sostenibel, mr. Geoffrey Wever, a confirma e noticia cu prijs di gasolin y diesel lo baha substancialmente entrante 10 di augustus.

            Aki ta papia di un reduccion di 42.5 cen (12.7%) pa gasolin, y un reduccion di 34.2 cen (10.9%) pa diesel per liter.

            E ta un custumber – den pasado – cu ta haci publicacion cu insinuacion y motivacion politico ora minister mester anuncia cu prijs di gasolin ta subi. Mientras cu e noticia di reduccion di prijs sigur ta uno hopi bon pa pueblo, minister Wever kier tuma e oportunidad positivo pa asegura un bes mas cu esaki tin di haber cu e desaroyo internacional den industria petrolero.

            Minister Wever ta contento cu e reduccion, mirando su efecto positivo riba e homber chikito, pero segun e mandatario “un bes mas nos ta ser recorda cu Aruba ta na misericordia di desaroyo internacional. Mester uza e oportunidad pa recorda pueblo e importancia di desaroyo sostenibel, den energia y otro aspectonan tambe.”

            Aruba mester comprension y cooperacion pa cu e desaroyonan cu mester tuma  luga pa hiba nos pais riba un rumbo mas sostenibel, unda nos por cuminsa bay den direccion di reduci nos Pais su dependencia riba factor nan externo. Esaki lo yuda nos como Pais ta mas fuerte y preveni situacionnan cu afecto (negativo) grandi pa henter comunidad.  Esaki ta keda nos meta pa e añanan binidero, Minister Wever a indica.