Manera anuncia pa DIARIO produccion mundial ta exigi petroleo y carbon - *Salida di 2021 yena cu preocupacion grandi pa aumento costo di bida - *OPEC ta reuni, ehercito ta yuda almacena gasolin y clima a bay sconde
ORANJESTAD (AAN) - Cu entrada di 2022 y estadia den 2022 lo no ta facil, ta algo cu DIARIO a adverti.
Mundo cu un ansia grandi cu no ta tene cuenta cu hopi realidad cu ainda mester atende, ta pretende cu ta tur problema ta tras di lomba.
Nada ta menos berdad mientras 2021 ta yega na su fin, cu un cantidad di pais cu no a wordo vacuna y Covid-19 leu for di wordo controla mientras tur medida ta wordo kita pa permiti economia reactiva.
Sinembargo, ademas di e problema serio di Covid-19, mundo mester atende cu un situacion mucho mas serio.
Na momento cu Covid-19 a presenta y mundo a haya su mes obliga di cera su portanan di produccion, prijs di energia a baha. Prijs di coriente a haci cu mundo no a mira otro prijsnan cu tabata subi pa motibo di scarcedad.
Mundo tabata haci uzo di menos gasolin por ehempel pasobra menos hende tabata biahe. Produccion mundial a baha debi na e cantidad di hende contagia cu Covid-19.
Produccion di petroleo, gas y carbon tambe a baha ya cu e demanda no tabata presente den un mundo paralisa, cu na 2021, a pesar di e hecho cu mundo no a controla Covid-19 ainda, kier bolbe na un normal cu no ta existi.
Durante siman cu a termina, e preocupacion grandi cu DIARIO a trece siman pasa cu prijs di petroleo, carbon y gas lo produci pa prijsnan di productonan, cu lo wordo afecta pa e aumento di energia necesario pa produccion, a rementa tanto den man di gobiernonan, organisacionnan mundial como publico na diferente lugar na mundo.
Prijs di gasolin a bira un menasa pa mundo y companianan grandi a splica cu aumento di gasolin y otro productonan cu ta wordo produci a base di petroleo manera plastic.
Na Europa y Merca aumento dramatico di prijs di gasolin y scarcedad a haci cu publico a acudi na pompnan, mientras por ehempel na Inglatera, ehercito a cuminsa almacena gasolin.
Asia a aumenta su pedidanan di gas mientras Europa a cuminsa cumpra mas carbon cerca Rusia pa asina sigura cu produccion ta sigui.
Scarcedad di producto riba mercado na momento cu hende kier bolbe bida normal a pesar cu e pandemia Covid-19 no a yega na un fin, a crea e situacion pa cual DIARIO a bati alarma dianan pasa pa mustra Aruba riba problemanan cu lo afecta bida na Aruba tambe.
Ayera OPEC tabata reuni pa mira si por produci mas petroleo pa asina baha e prijs cu a sigui subi for di momento cu e caida di actividadnan debi na e Coronavirus nobo a baha produccion.
Prijs di petroleo tabata sigui bay halto loke ta nifica cu productonan petroleo necesario pa produccion, tabata bira mas caro y asina afecta tur prijs na mundo y sigur e prijs di transportacion y comunicacion.
DIARIO ta vigila e situacion mundial pa tene Aruba informa pero ta sumamente necesario pa e Arubiano cuminsa realisa e situacion sumamente dificil na mundo.
Na e momentonan aki mester atende cu cambio di clima cu ta causa tragedia enorme rond mundo pero tambe mester atende cu falta di e energia costumbra, cu ainda hende no por reemplasa.
Tur cos ta indica cu Aruba tambe mester tene na consideracion cu produccion ta bira mas caro y cu prijsnan lo aumenta sigur na final di 2021 mientras calculacionnan internacional ta wordo haci pa 2022, cu manera DIARIO a adverti no ta nada facil!
