Peso di gasto di hende iresponsabel riba ciudadano conciente - *Democracia no ta permiti prevencion pero tur hende mester paga - *Boca grandi cu ta abusa di sistema ta trapa riba e pagador di sistema
ORANJESTAD (AAN) — E situacion despues di Covid-19 ta exigi cambionan pa miho, pa normalidad na un mundo cu for di basta tempo no conoce e nificacion di e palabra “normal”.
For di añanan 70, cu mundo a conoce “accionnan di protesta”, algo serio a pasa cu Democracia, cu awe mester wordo analisa.
“Democracia” ta nifica Gobierno di Pueblo. Cu otro palabra no solamente un Gobierno cu ta wordo eligi pa Pueblo pero tambe Gobiernonan cu ta produci tur ingrediente necesario pa bienestar di Pueblo wordo sirbi segun loke ta na interes di e gran mayoria..
Awe mester analisa loke a pasa cu e concepto “Democracia”. Te ki grado Democracia ainda ta husto?
Un ciudadano conciente ta spierta mainta. Mescos cu tur hende e kier sigui drumi un rato mas, pero e ta bandona su cama y cuminsa prepara pa bay atende cu su debernan.
E ta percura pa su famia tin entrada, pa yiunan bay school, pa debenan ta paga, pa tur loke ta cay bou di su responsabilidad.
Como hende e ta percura pa su mes tambe, tanto dor di percura pa un bida placentero pa su mes, pero tambe un bida cu no ta hinca ni su mes ni otro den problema.
A base di e concepto di “democracia” e ta evita problema cu leynan cu mester respeta.
Te cu poco tempo pasa, un ciudadano homber of muhe, cu comporta su mes di e forma aki tabata un “cabayero”. Awe e ta mas bien un ser estudipo cu no ta na haltura con e por saca probecho for di otro.
No tin nomber denigrante cu e no ta haya pasobra e ta para na luz cora, ta sigui tur ley di Covid-19, ta nenga di horta su pais of uza su pais pa su interes.
Si tin un trabou cu ta yuda crea un impresion di loke nos mundo a bira realmente, ta periodismo.
Continuamente nos a ricibi informacion. Protesta pasobra gobierno ta proteha hende cu no kier muri di Covid-19 contra hende cu kier biba manera nan kier sin tene cuenta cu tin mas hende na mundo.
Protesta pasobra no por castiga hende cu ta dicidi di subi caya, paralisa trafico pasobra no ta permiti nan cacho haci sushi riba caya grandi pa otro haci limpi.
Protesta pasobra hende cu tin miedo di culebra, mester acepta cu un hende ta dicidi di subi bus cu su colebra.
Leynan ta indica unda por landa y unda ta peligroso. Pero no por stroba cualkier hende bula na lama na luga peligroso, sin salbabida, pasobra ta su derecho democratico di haci loke e kier.
Ora e ta casi hoga, comunidad mester paga pa ehercito, cuerpo di bombero, cuerpo policial percura cu e no ta muri den hola.
Aruba ta lucha contra un pandemia. Cantidad di hende cu hamber no por haya yudansa pasobra mester di placa pa atende cu e malesa, cu ta sigui crece pasobra segun democracia no por exigi hende proteha su mes contra e malesa.
Fondo di AZV ta kibra rond mundo pasobra hende cu ta conciente cu e tin un enfermedad, ta haci loke ta plama e enfermedad y ningun hende no por bisa nada.
Esaki no solamente ta conta pa Covid-10. Antes prostitucion tabata tin regla. Awor e ta asunto general.
Autoridad no tin nada di bisa. Hende drechi ta payaso y mester cera su boca y paga pa tur loke abusador kier haci.
Hamas den historia mas uzo a wordo haci di e palabra “democracia” cu den e mundo moderno cu a splica tur hende cu e palabra ta conoci.
Awor den nomber di democracia ta kibra ley, ta afecta e pais, ta kibra bienestar di comunidad.
Democracia a bira inhusto? Si! Pasobra awe Democracia ta depende di un boca grandi, un actitud di abuso y hasta criminal.
Awe Democracia ta depende di falta di concenshi pa kibra hende cu acusacion falso y sushi pa asina logra loke kier.
Democracia a bira inhusto pasobra e ta sirbi enemigo di democracia, cu ta parasitonan di un sistema cu nan ta destrui!
