Prijs di coriente ta bay aumenta cu 23.93%

Entrante Dialuna awor...

ORANJESTAD(AAN): Hopi hende a keda cu cara babuca riba Diabierna atardi, ora nan a tende con caro coriente lo bira na Aruba entrante Dialuna 1 di Augustus 2022.

   Esaki tur lo bay contribui pa mas producto subi di prijs, specialmente tur comestible warda den freezer, den coolers, y mas.

   Cuminza prepara pa drumi den airco, cu ta opera kizas pa 4 ora so tur anochi.  E resto di anochi dal bentana habri of drumi cu fan.

   Conferencia: Director di NV Elmar Anthony Irausquin Diabierna a duna un splicacion riba e ahuste den prijs di coriente cu ta bay tuma lugar, cuminzando na Augustus.

Durante un conferencia di prensa Irausquin a splica cu e aumento den e tarifa di coriente pa tur cliente den tur bracket ta bay ta uno di 23.93%.

Asina mes e director a indica cu e ta keda un prijs social, unda cu esun cu gasta menos lo paga menos.

“E ahustacion di prijs di coriente ta refleha menos impacto directo riba inflacion y e aumento ta pa garantiza continuidad di servicio optimal di suministro di coriente y pagando su proveedor WEB, pasobra nos tin cu sigui paga WEB, segun e director di NV Elmar.

Irausquin a indica for di inicio cu Elmar ta transmiti y distribui coriente cu nan ta cumpra for di WEB.

Pesey el a indica cu e aumento tin di haber cu e aumento den gastonan cu WEB ta wordo confronta cune.

Basa riba e ahustacionnan di WEB, NV Elmar tambe ta haci ahuste.

Irausquin a duna di conoce tambe cu ta bon pa menciona cu di tur locual Elmar bende, 80% ta bay bek na WEB, pues esey ta e prijs cu e compania ta paga pa distribui coriente na Aruba.