Prijs di Consumo pa luna di Juni 2024 a conoce un caida di 0.6% compara cu e indice di Mei 2024

Oficina Central di Estadistica

ORANJESTAD (AAN): Oficina Central di Estadistica ta presenta e resultadonan principal di e Indice di Prijs di Consumo (CPI) pa luna di Juni 2024.  

E CPI pa luna di Juni 2024 ta 108.72, loke ta representa un caida di 0.6% compara cu e indice di Mei 2024 (109.41).

E cambio di e CPI pa e ultimo diesdos (12) lunanan (Juni 2023 te cu Juni 2024) ta 2.4%, un caida di 0.4 punto di porcentahe (ppt) compara cu e periodo corespondiente di aña pasa (2.8%).

E promedio anual (ultimo 24 luna) di e tasa di inflacion pa e periodonan di Juni 2021 te cu Juni 2022 y Juni 2023 te cu Juni 2024 ta 1.7%, un caida di 4.2 ppt compara cu e 5.9% registra den e periodonan di Juni 2020 te cu Juni 2021 y Juni 2022 te cu Juni 2023.

 Durante e luna aki, shete (7) di e diesdos (12) sectornan a registra caida di prijs. E caidanan cu tawata tin e mayor efecto riba e CPI a wordo registra pa e sectornan di “Transporte” (-2.6%) y “Mobilario” (-2.5%), causando un efecto di respectivamente, -0.35 y -0.21 ppt. E caidanan den e sectornan restante a contribui cu un efecto di -0.19 ppt riba e CPI di Juni 2024.

 E caidanan aki a wordo contraresta parcialmente door di principalmente un subida den e indice di e sector di “Comunicacion” (0.9%) cu a contribui cu un efecto di 0.07 ppt riba e CPI di Juni 2024. E subidanan den e sectornan restante a contribui cu un efecto di 0.04 ppt riba e CPI di Juni 2024.

E caida den e sector di “Transporte” a wordo causa principalmente door di un caida di 2.9% den e categoria “Gasto relaciona cu uso di vehiculo di transporte personal”, causando un efecto di -0.25 ppt. E caida den e sector di “Mobilario” a wordo causa principalmente door di un caida di 4.6% den e categoria “Aparato pa uso domestico”, causando un efecto di -0.10 ppt.

E subida den e sector di “Comunicacion” a wordo causa door di un subida den e categoria “Ekipo di telefon y fax” (24.5%), causando un efecto di 0.07 ppt.