Liberato Hoek, Hefe di Servicio di Ambulance ImSan:
ORANJESTAD (AAN): Servicio di Ambulance ImSan, manera tur aña, ta prepara pa cualkier eventualidad durante Semana Santa. Tradicionalmente, esaki ta e siman den cual hopi ciudadano ta tuma pa campa banda di lama, specialmente.
Señor Liberato Hoek, Hefe di Servicio di Ambulance ImSan, den un entrevista recien a enfatisa cu lo no tin ambulans di e servicio staciona banda di e playanan. Tur ambulans lo keda posiciona na nan postnan regular, pa por responde na tempo na cualkier emergencia medico rond di e isla.
El a indica cu, despues di Carnaval, esaki ta un di e periodonan mas druk pa Servicio di Ambulance. Consumo di alcohol durante e siman aki ta considerablemente halto y e beachnan, specialmente den areanan di campamento, ta bira hopi druk. Esaki, pa un of mas motibo, por resulta den incidentenan caminda intervencion di ambulans ta necesario.
Señor Hoek a enfatisa cu, hustamente pa e motibonan aki, ta hopi importante pa mantena bon supervision riba muchanan cu ta campando, specialmente esnan cu ta bay landa, sea den lama of den pool, pa preveni cualkier incidente lamentabel.
El a recomenda tambe cu personanan cu malesanan cronico, y cu ta uza medicamento, mester sigui nan tratamento durante e periodo di campamento segun prescripcion medico, respetando e oranan stipula, y evita pa mescla medicina cu alcohol, pa preveni complicacionnan di salud durante e temporada dushi aki.
Ademas, ta di gran importancia pa pone atencion na e preparacion y conservacion di cuminda cu ta hiba na campamento. Cuminda cu no ta warda ni trata corectamente por deteriora y causa malestar serio.
Segun señor Hoek, tur esakinan ta recomendacionnan basico pero esencial pa ciudadanonan tene na cuenta, pa preveni situacionnan lamentabel cu por evita. Esaki ta un temporada di pasa dushi den famia y amistadnan y mal incidentenan por ser evita si cada ciudadano cu ta bay campa, cumpli cu nan responsabilidad sigui reglanan di campamento, cuida nan mes y no kita bista riba nos muchanan.
“Servicio di Ambulance ta aki pa henter Aruba na momento di cualkier emergencia, y na cualkier parti di e isla mester tin acceso na cuido medico. Importante ta pa cuida durante e temporada tradicional di campamento. Prevencion ta clave pa asina reduci nesesidad di asistencia di ambulance,” señor Hoek a declara.
