Parlamentario Rocco Tjon ta mustra:
- Dowers a cuminza cu 12.3 miyon y a cera su termino cu 13.6 miyon
ORANJESTAD (AAN) Parlamentario Rocco Tjon, den entrevista cu Matutino DIARIO, a splica con e presupuesto, specificamente pa Husticia, a aumenta durante su temporada como minister, den Gabinete Wever-Croes.
Tjon a haya hopi importante pa splica cu semper den un presupuesto tin loke ta wordo presupuesta y loke ta wordo uza tambe.
El a presenta cifranan cu el a subraya cu ta cifranan real, den e presupuesto di Cuerpo Hudicial, pa loke a wordo uza.
El a splica cu na 2014, e tempo ey Minister Dowers, a duna KPA 12.3 miyon florin cu nan a uza; na 2015, 12.1 miyon florin; na 2016, 13.1 florin, y na 2017. 13.6 miyon florin.
“Mi mester bisa cu esaki, pa mi pon’e den contexto tambe, ta e temporada cu no tabata tin un pandemia cu a afecta e finanzas di bo pais. Simplemente, Husticia nunca tabata un prioridad pa Gabinete Eman; esey ta realidad! Na 2018, tempo cu Gabinete Wever-Croes a cuminza bin na mando, e tempo ey di berdad no tabata tin material suficiente, no tabata tin proyectonan innovativo; aworaki, nos tin radars na tur caminda, nos tin ‘body cams’, nos tin camera rond di Aruba, cu tecnologia tambe, cu KPA por haci uzo di dje no solamente pa soluciona caso, pero pa preveni caso”, Parlamentario Rocco Tjon a señala.
El a resumi cu na 2014 e gobierno di e tempo ey a cuminza cu 12.3 miyon florin cu a keda na 12.1 miyon, y na 2017 señor Dowers a cera su termino cu 13.6 miyon florin. Pa 2018, bao Gabinete Wever-Croes, e tabata 13.6 florin e prome aña, mescos cu na 2017; na 2019 el a aumenta pa 15.8 miyon florin (un aumento di 2 miyon florin), na 2020 el a aumenta cu na 17.1 miyon.
Na 2021, apesar cu e situacion financiero no tabata bon door di Covid-19 e tempo ey, Gabinete Wever-Croes a sigui prioritiza Husticia y Cuerpo Policial den e caso aki, y nan a haya un aumento te na 17.6 miyon florin; na 2022 esaki a bay na 18.1 miyon florin; na 2023 esaki a bay na 19.5 miyon florin.
“Si mi tuma un rato bao di Dowers na 2014, 12.3 miyon florin den e caso aki bao mi persona na 2023, 19.5 miyon florin, tin un aumento di 7.2 florin pa KPA so. Esaki no ta e otro organizacionnan. Pues, mi no por compronde e ponencianan cu a hereda un cadena hudicial, den e caso aki un Cuerpo Policial den decadencia”, Parlamentario Rocco Tjon a señala.
