Diasabra anochi a intercepta boto cu 16 stranhero indocumenta tratando di drenta Aruba

Diasabra anochi a intercepta boto cu 16 stranhero indocumenta tratando di drenta Aruba

Dos a keda deteni

  • Na final diescuatro lo wordo deporta bek 

ORANJESTAD (AAN): Tabata Diasabra anochi, cu radar a tuma nota di un contacto sospechoso nabegando den direccion di Aruba.

   Inmediatamente a notifica personal di e avion Dash-8 di Wardacosta di Caribe Hulandes pa dirigi nan mes rapidamente na e localidad.

   Mientras tanto tambe a pidi personal di un boto di reaccion rapido Metal Shark pa sali for di Steunpunt di Savaneta, y dirigi nan mes den e mes un direccion.

   E avion Dash-8 uzando camera sofistica, a logra di constata cu ta trata di un lancha cu personanan indocumenta.

   E Metal Shark a logra di yega na e momento necesario pa asina por intercepta e lancha riba lama, y nan no a haya chens pa huy.

   Nan a transporta e lancha y e personanan y a hiba nan te na Steunpunt di Wardacosta di Caribe Hulandes na Savaneta.  Ta trata di un total di 16 hende homber indocumenta.

   Di e 16 personanan, a detene 2 y a entrega e otro 14 homber na personal di Guarda Nos Costa, cu ta keda encarga pa bay deporta nan bek for di e isla.