ORANJESTAD (AAN): Diabierna mainta, Parlamento a cuminsa trata e tema di Presupuesto 2021 cu a conoce algun luna di atraso.
Ministernan di Gabinete Wever-Croes a contesta preguntanan di Parlamentarionan, cu e biaha aki tambe ta ministernan demisionario. E reunion a bay den un bon esfera y a logra trata varios tema, manera husticia, finanzas, salud y enseñanza. Prome Minister Evelyn Wever-Croes a hiba palabra y el a laga sa cu el a haya 58 pregunta y el a purba di contesta nan.
Na final di e reunion, Prome Minister a enfatiza riba e necesidad di aprobacion di e presupuesto pa asina por sigui yuda esnan cu ta depende di FASE y subsidio di salario, mirando cu e crisis no a pasa, apesar cu Aruba ta den recuperacion. Prome Minister a pone hopi atencion riba problemanan social cu Aruba ta pasando aden, specialmente famianan cu no tin cuminda pa come tur dia y ta responsabilidad di Gobierno pa yuda nan.
Na final di e reunion, Presidente di Parlamento señor Edgard Vrolijk a anuncia cu e presupuesto a wordo aproba unanimamente y a gradici cada fraccion pa haci un diferencia den Parlamento. Parlamentario Marisol Lopez-Tromp a pidi pa un hoofdelijke stemming pasobra e kier a vocifera cu su fraccion ta contra e ley. Presidente di Parlamento a expresa cu esnan mas 'veterano' den Parlamento mester sa miho y sa masha bon con e proceso ta bay. El a pidi pa un hoofdelijke stemming y a keda warda pa contesta, ningun hende a reacciona y despues cu el a aproba e ley, e ora ta pidi pa esaki.
