Meta ta pa yega e nivel necesario na 2030 - ORANJESTAD (AAN): Parlamentario Miguel Mansur riba Diabierna durante tratamento di e Presupuesto di Gobierno,
a haci e pregunta na Ministro demisionario di Enseñanza, Rudy Lampe si acaso algo a wordo haci cu e “normbedrag” cu ta indica cuanto placa Gobierno mag di gasta pa cada alumno na diferente scolnan na Aruba.
Ministro Lampe a mustra cu tin un Rapport di Normbedrag cu tin e meta pa por yega na aña 2030 na e suma di placa adecuado pa educacion na Aruba.
E rapport ta inclui e calculo di e normbedrag pa cu subsidionan di enseñanza unda cu enberdad desde 2009 no a aumenta e normbedrag aki.
Segun Ministro, aworaki e Gobierno aki a logra di haci esaki budget-neutraal, y pesey e Ministerio di Enseñanza a ricibi autorizacion di Directie Financien pa aumenta e normbedrag.
“Pasobra mi maneho ora mi a bira Ministro tabata pa corta vet unda cu por corta vet cu no ta un uso eficiente di e placa, pa por hink’e den e aumento di normbedrag. Y a logra pa presupuesto di 2022 ta bay tin e aumento via fase di normbedrag”.
Ministro demisionario Lampe a menciona algun ehemplo di e aumentonan den e prome fase. Pa scolnan preparatorio, e normbedrag ta aworaki na 114,95 Florin pa mucha. E lo bay subi na 2022 na 119 Florin.
E suma di normbedrag pa Scolnan Basico, e ta 167,25 Florin pa alumno, y na 2022 e lo subi y bira 260 Florin. E normbedrag pa Scolnan MAVO aworaki e ta na 251,65 Florin pa alumno, y e lo bira 292 Florin na aña 2022.
Ministro a sigui bisa cu normbedrag pa Scolnan HAVO aworaki ta na 378,65 Florin pa alumno y e na aña 2022 lo bira 466 Florin. Normbedrag pa Scolnan Avond HAVO aworaki ta na 247,50 Florin pa alumno, y lo bira 351 Florin na aña 2022.
Normbedrag pa Scolnan EPB aworaki ta na 265,90 Florin pa alumno, na aña 2022 lo bira 329 Florin. Normbedrag pa Colegio EPI lo subi for di 442,75 Florin pa alumno, lo subi y bira 510 Florin na aña 2022. Tur esaki segun fase, y cada aña despues lo sigui crece, pa finalmente na aña 2030 lo yega na e nivel cu Aruba mester ta pa inversion den enseñanza pa cada mucha.
Debi na e aumento aki, Aruba lo por yega pa cumpli cu e demanda cu tin pa digitaliza e sistema di enseñanza. E aumento ey di subsidio por wordo inverti den Digiboard, den Tablets, den Chromebooks, den licensing fees, pa asina actualiza e sistema di educacion.
E normbedrag aki ta inclui no djis e mantenimento di scolnan, sino tambe e material pa educacion.
