Trahadornan tambe ta hopi desanima cu gerente nobo
ORANJESTAD (AAN): E siman aki cu a bira conoci cu e organizacion di Æ-2020 Aruba Entertainment a wordo lanta oficialmente, ya caba DIARIO a bin ta ricibiendo e detaye, cu e organizacion aki tin di bay check con un prestigioso Hotel riba e strip turistico di Palm Beach a bin ta tratando musiconan local den ultimo temponan.
E situacion a bay asina leu, cu awor na Augustus 2021, e prestigioso Hotel aki no tin ni un musico local ta trahando eynan. Turistanan cu normalmente ta costumbra di tende musica en vivo na e cadenanan hotelero asina rond mundo, tin di bin realiza cu na Aruba no tin ningun tipo di musica en vivo na nan Resort.
Pero no ta djis musiconan ta reclamando, hasta trahadornan di hopi decada cu ta laborando na e prestigioso Hotel aki, a bin ta kehando cu e gerente general nobo cu ta na mando desde aña pasa of mas caba, ta kehando cu e musiconan na Aruba ta ‘cobra mucho placa’, y tambe kehando cu e trahadornan di Aruba ta parce di ta ‘gana mucho salario’.
E gerente general aki cu ta procedente di Colombia, aparentemente tin e pensamento cu ta salario na nivel di Colombianonan e tin di paga tur hende cada quincena. E ta pensa cu kizas ta e tarifa abao di musiconan na Colombia e lo tin di paga e artistanan local pa toca.
Y loke ta trece mas disgusto, ta cu varios trahador na e prestigioso Hotel aki tambe ta pensando cu e gerente general aki ta parce di ta haciendo bida di e trahadornan imposible, djis pa nan retira y kizas na su lugar pone stranheronan Colombiano ocupa nan puesto.
E parti di mas tristo? Ya caba varios trahador Arubiano a fada, y a djis acepta un miserable pakete y a retira di e prestigioso Hotel aki unda nan a traha pa varios decada na un forma fiel.
E gerente general aki ta eliminando trahadornan fiel di hopi aña, y ta tumando algun trahador hoben cu no ta keda ni 8 luna na trabao y ta core kita bek. Esey ta demostra cu e gerente general aki no sa e balor di un trahador fiel di hopi decada laborando pa e compania. Trahadornan fiel cu a sa di eleva e nomber di e prestigioso Hotel aki, ultimo temponan ta mira cu nan futuro ta hopi scur danki na e modus operandi di e gerente stranhero aki.
Ta den casi tur Departamento caba el a pasa basora aden, poniendo trahadornan bao presion innecesario, pone algun di nan haci trabaonan humiliante, te cu nan a djis entrega nan retiro. Con bo ta pone un manager di un Casino wordo obliga di bay traha den Housekeeping y forzosamente pone e persona haci toilets y showers limpi?
E trahadornan no sa kico mas pa haci! Lo bueno ta cu nan informantenan ya caba a notifica Gobierno di loke ta pasando, pa nan tene bon bista. E speranza tey cu Departamento di Labor bay hala atencion di e prestigioso Hotel, cu e estilo ey di trata trahadornan no ta aceptable den e mundo moderno aki.
Varios trahador a hasta denuncia un sorto di triki cu a wordo haci cu nan pa cu nan pago di quincena cu ta encera e 12% service charge. Gerencia a priminti nan cu lo haci cambio, cu na final lo bay nifica extra placa tur quincena den nan cartera. Pero inespera y tras di nan lomba, gerencia a introduci un extra off-day den e contract, y esey a laga tur e trahadornan cobra menos placa awor.
E triki aki di 12% y e 3% aki, a pone cu algun persona cu tabata gana 900 Florin mas o menos pa quincena, awor ta cobrando alrededor di 600 Florin.
Y e turistanan? Keto bay pasando vacantie den e prestigioso Hotel, ta djis scuchando pre-recorded background music! Nada di musica en vivo mas, ni cu musico stranhero, ni musico local.
E unico “grupo di trahador” cu no a wordo afecta ainda, ta e empleadonan fiel di hopi decada cu ta traha na e Restaurantnan cu ta famoso pa nan Sunday Brunch. Eynan ainda e gerente general Colombiano no a logra introduci un guera ainda eyden. Eynan si nan ta para e gerente general!
Pa tal motibo, un suplica ta bay na e grupo nobo di musica, esta Æ-2020 Aruba Entertainment pa bay investiga kico ta pasando na e prestigioso Hotel aki cu actualmente no tin ni un solo musico trahando eynan. Y esaki ta algo di basta tempo caba, no djis un asunto di excusa pa cu pandemia tampoco.
