ORANJESTAD (AAN) – Señora Haydee Henriquez a wordo presenta durante un evento, diamars cu a pasa,
como Presidente nobo di Stichting Koningin Wilhelmina Fonds (KWF).
Manera ta conoci durante e evento aki a conmemora e di 64 aniversario di e Stichting y introduci su Presidente nobo señora Henriquez, y a honra e Presidente saliente, señora Lily Prince.
Den un entrevista, señora Henriquez a bisa cu e proceso pa bira Presidente nobo di e Stichting, a cana basta lihe, pero e confianza cu Lily Prince a dune den e Fundacion ta hopi grandi, ya cu e tin un experiencia hopi grandi den KWF, y mirando con el a haci su trabao a inspira señora Henriquez poco, poco te cu el a dicidi na final cu e ta cla pa tuma e batuta over for di dje.
“Pero semper cu e ayudo di e directiva y di e comunidad di Aruba, pasobra sin nan ayudo Kanker Fonds tampoco por yuda e clientenan di Aruba. Asina ta, cu boso sosten mi ta spera di nos por sigui pa otro 64 aña atrobe, manera Wilhelmina Kanker Fonds ta cumpliendo awe.
“Mi ta haci un yamada na pueblo di Aruba pa hendenan cu kier bira boluntario, nan por acerca Wilhelmina Kanker Fonds pa duna un man, p’asina un yuda otro; ora cu malesa bati na bo porta, nos por yuda bo”, Haydee Henriquez a expresa.
El a agrega cu e dia aki tabata uno grandi tambe, p’e por a tuma over 40 aña cu Lily a eherce y pa su persona siete aña apenas di a tum’e over. “Kiermen, mi zapato ta basta grandi pa nos yena, pero mi ta kere cu, cu sosten di boso tur, e directiva cu mi tin para mi tras, y cu e pueblo di Aruba, mi ta kere nos por!” Asina señora Haydee Henriquez a subraya.
