Presidente di SNBA preocupa pa e infrastructura mahos pafo di Secrets Hotel

*Santana di Cacho ta parti di e problema

ORANJESTAD (AAN) – Errol de Freitas, Presidente di San Nicolas Business Association (SNBA) den entrevista cu DIARIO a expresa cu danki Dios, Secrets mester verschuift atrobe. “Mi kier gradici e Director di DIMAS cu SNBA a haya chens di sinta cu ne y cu nan tin contacto, y cu e ultimo permisonan specializa cu ta esnan cu ta bay bira un poco pega, por yega prepara y habri, cu e cosnan ta sosodiendo” de Freitas a bisa.

            Tocante e tema di Santana di Cacho, el a sigui bisa cu esaki ta algo cu mester sigui papia di dje, sinta den un dialogo, of kico cu nan kier yame. “Pero nos tin cu atake. Nos a pidi e avenida ey. Desde momento cu nos a pidi e avenida, DOW a bin cu cinco diferente avenida. Nos a bisa nan pa hacie simpel; envez di nan subi Lago Heights ta corta straight den e refineria. Mi a papia cu e director di e Refineria, el a bisa mi cu un tanki cu supuestamente ta molestia, eynan por kita facilmente, e avenida ta dobla banda di gasoline station eynan, nan ta tuma e service road straight e cruzada eynan, subi Seroe Colorado bin abao”, de Freitas a relata.

            El a ta pidi e hendenan cu ta envolvi pa drecha e lugar, pasobra no tin ni un borchi di trafico, no tin nada riba nan pero pariba ta un dragstrip y pabao, banda di e refineria nan ta haci fiber.
“Mi kiermen, ban tuma e cosnan aki na serio, bo tin un desaroyo yegando pariba, tur e casnan abandona, tur e bushi cu ta tur caminda, anto bo ta bay habri un hotel di marca aki? Anto nan tin cu pasa wak esaki?” De Freitas a señala y a expresa finalmente, cu tur cos “cu ta bin pariba tin problema”.