Pa loke ta trata parkeo asigna na parlamentarionan:
ORANJESTAD (AAN) –Den entrevista cu Presidente di Parlamento, mr. Edgard Vrolijk, a duna di conoce cu actualmente tin un discusion cu gobierno, pasobra e Parlamentarionan a perde di un dia pa otro, nan lugar di staciona nan auto, y e problema aki ta mas bien ehecucion y control.
A bin e proyecto di Aruparking, Cocolishi, y patras e Plaza Padu, y cu esaki a kita tur parkeo di Parlamentarionan, cu a keda full benta, desampara.
Presidente di Parlamento a comenta cu nan tabata den dialogo cu Prome Minister, cu ta e titular di DOW, pasobra e tereno ey ta di gobierno. Nan a asigna 21 vak pa e parlamentarionan. Entre otro, Minister Arends a manda, un par di siman atras, pa registra y e ora ey tin cu a registra y tin cu no a hacie.
Tin un parlamentario cu a registra y toch a haya un sticker riba su auto. Aworaki tin un disputa entre “bay bin” y Presidente di Parlamento ta meymey di dje, segun el a comenta.
Vrolijk a señala cu na Corsou y Sint Maarten e parlamentarionan tin nan parkeo asigna y hasta tin pa bishitantenan, pero na Aruba, prensa por ehemplo, no tine. E ta kere cu mester regula esaki.
El a bisa cu e tereno menciona ta di parlamento, y tin cu respet'e. Pero e parlamentarionan tin cu registra esaki, pa Aruparking sa cu esey ta nan lugar. Señor Mike de Meza a trece e idea pa pone e number di nan auto, di manera cu ningun otro hende por uza e espacio ey. Ni otro parlamentario por para den e lugar aki tampoco.
Edgard Vrolijk a haya cu esey ta un bon idea y a puntra DOW, y nan a bisa cu nan tin cu puntra tur e parlamentarionan, si nan ta di acuerdo pa pone nan number, pues, esnan cu kier pasobra no por kibra privacidad di hende tampoco. Nan tin cu bay di acuerdo cune y esey mr. Vrolijk ta bezig cune. E ta kere cu den dialogo esaki lo wordo regla y pa otro siman lo tende mas di esaki y cu tur cos ta cana nechi.
https://diario.aw/categories/noticia/general/presidente-di-parlamento-ta-indica-cu-aworaki-tin-discusion-entre-su-persona-y-gobierno#sigProIddef0ff4039
