Hendrik Tevreden, fraccion di MEP:
- No trat’e na tempo tin consecuencianan mara na dje
ORANJESTAD (AAN) – Parlamentario Hendrik Tevreden, di fraccion di MEP, a declara den entrevista cu DIARIO, cu su fraccion ta desea pa e presupuesto 2025 wordo trata.
Si e no wordo trata prome cu tempo lo tin hopi consecuencia mara na esaki. El a bisa cu e ta kere cu e Koninklijke Besluit (KB) lo por cay pa e propio gobierno cu ta formando.
“Señora Gerlien Croes, cu t’aworaki presidente di Parlamento, e tin e autoridad completo riba dje aworaki, pa por yama reunion, sinembargo e ta yamando diferente otro reunionnan sin pone atencion, pero e no a yama e reunion di presupuesto 2025 mes.
“E ta sconde tras di un reunion den CHA, tempo cu señor Kamperveen tabata voogzitter. E tempo ey señor Mansur a bisa pa laga tratamento di presupuesto pa 2025, ora cu e gobierno nobo forma. Tabatin intercambio di pensamento riba esaki, y e punto ta cu ora bo ta laga esey pa e gobierno nobo, ta si e forma na tempo. Pero den e caso aki, bo tin 11 siman ta bay caba y e gobierno aki no tin fin di forma, loke ta haci cu nos ta bay cay laat, pa locual ta responsabilidad di Pais Aruba, pa loke ta presupuesto 2025”.
Tevreden a señala cu tur hende aworaki, ta na haltura di cu e contestacion di Gobierno a yega Parlamento, pues pa loke ta e ley aki tur cos ta cla, y un fecha mester wordo poni pa trata e presupuesto 2025. Nos ta para riba esaki”, Treveden a remarca.
Parlamentario Hendrik Treveden a subraya cu, pa colmo, Fraccion di MEP a manda un cantidad di peticionnan, di cartanan skirbi oficial, pa presidente di Parlamento Gerlien Croes, pa yama e reunion aki, y nan no tin contesta ainda, riba esaki.
El a señala cu por mira cu e diferente pechinan cu señora Croes tin bisti, ta cay mucho pisa p’e, pero esey ta su escogencia, pero no por ta asina cu e ta tranca un pais, pa no yama un reunion di presupuesto, pa motibo cu e ta bezig cu otro agendanan di Partido FUTURO.
