Parlamentario Dangui Oduber (MEP):
ORANJESTAD (AAN): E ley di presupuesto ta e ley di mas importante den gobernacion. For di aña pasa Gabinete Wever-Croes 2 e entrega e presupuesto na tempo na Parlamento pa asina e wordo trata. Lamentablemente presidente di parlamento sra Gerlien Croes a secuestra e presupuesto 2025 di pais Aruba desde cu el a bira presidente di parlamento. Sra Croes a duna e speransa cu e lo ta un presidente nobo, jong dinamico y diferente. Den practica el a resulta un desapunt'e cu mas bien ta un marioneta di Mike Eman manera e tawata tempo e ta riba lista di AVP!
Pa casi 3 luna sra. Gerlien Croes tin e presupuesto secuestra y ta despues cu CAFT a bishita parlamento y el a ricibi un carta di conseho di minster di reino, bao presion e no por a haci otro cu yama e reunion pa asina cuminsa trata e presupuesto 2025 di pais Aruba diabierna ultimo 7 maart 2025.
Pa nos sorpresa e presidente di parlamento sra Croes a sera e reunion, schors e tratamento di presupuesto te proximo aviso despues cu Mike Eman a termina su discurso caminda el a presenta un amienda cu algun cambio den e presupuesto. Loke ta condenabel ta e hecho cu Mike Eman tawata e prome orador y tawata tin varios orador a inscribi nan nomber pa hiba palabra y algun miembro di fraccion di MEP tambe kier a presenta un amienda cu cambionan den e presupuesto 2025.
Loke sra Croes a haci diabierna ultimo ta actua como un dictador. El a nenga lider di fraccion di MEP un punto di ordo, el a kita e derecho di tur otro 20 miembro pa entrega un amienda y demostra su cara real cu ta un presidente di parlamento di AVP y no un presidente di parlamento di Aruba.
Fraccion di MEP ta lamenta e actitud dictatorial aki di sra Croes caminda poco poco e ta demostrando su ‘’true self’’ na su manera di actua. E presidente di parlamento di e forma di actua aki a falta respet pa e organo di mas halto y sigur a falta respet pa e mas di 17.000 votadornan di MEP. Nos ta eyden pa representa pueblo y nos a exigi e presidente sra Croes mas respet y pa e stop di actua manera un dictador.
