ORANJESTAD(AAN): Dineke de Groot, Presidente di Hoge Raad, e siman aki ta bay haci un bishita di trabao pa Aruba, Corsow y St. Maarten.
Hoge Raad ta huez di casaccion den casonan procedente di Hulanda y e islanan Caribense di Reino(Aruba, Corsow, St. Maarten, St. Eustatius, Bonaire y Saba).
Door cu e medidanan di Coronavirus a wordo suaviza, awor a bira posibel pa Dineke de Groot haci un bishita di trabao na e tres islanan, pa duna mas realce na e conexion cu derechonan y hurisprudencia den Hulanda Caribense.
E bishita di trabao ta tambe den cuadro di cera conoci cu Gobernador Interino Yvonne Lacle-Dirksz, Gobernador di Corsow Lucille George-Wout, Gobernador di St. Maarten Eugene Holiday, Prome Minister di Aruba Evelyn Wever Croes, Prome Minister di Corsow Gilmar Pisas, Prome Minister di St. Maarten Silveria Jacobs, e hueznan y mas empleado di corte, Ordo di Abogado y Ministerio Publico di e islanan.
Banda di esaki de Groot lo duna un college tocante Hoge Raad 2021 como invitado special na Universidad di Aruba y The University of Curaçao.
De Groot ta presidente di Hoge Raad for di 1 di November 2020.
E ta prome hende muher cu ta presidente di Hode Raad desde cu esaki a wordo institui na 1838.
Desde 1990 de Groot ta miembro di e poder hudicial.
Despues di su opleiding di huez desde 1996 e tabata conecta cu corte di Amsterdam y desde 2009 tambe na corte di Arnhem.
Desde 2012 de Groot ta traha na Hoge Raad den derechonan civil y derechonan di belasting y desde prome di Januari 2018 te cu prome di November 2018 como vice presidente.
Desde mitad di 2011 e ta profesor special di Hurisprudencia y solucion di conflicto na Vrije Universiteit Amsterdam.
