ORANJESTAD (AAN) — David Meijer, Presidente di Raad van Toezicht di Stichting Algemene Bejaardenzorg Aruba (SABA),
a yama un conferencia di prensa Diamars mainta, cu e meta di trece aclaracion riba diferente pregunta cu a lanta den comunidad e ultimo dianan, tocante e Stichting.
Meijer a cuminza dunando un relato cortico di SABA. El a splica cu SABA ta un stichting cu a wordo funda dia 22 di Maart 1972, kiermen e tin 51 aña di existencia. El a cuminza como un iniciativa priva, y a crece te cu actualmente tin tres localidad cu ta San Pedro de Verona na Playa, Huis Maris Stella na Savaneta y Centro di Cuido na San Nicolas.
El a cuminza pa duna vivienda y asistencia na adultonan mayor, cu tabata tin mester di cuido basico, pa pasa dia, come y drumi. E tempo ey esnan cu a drenta tabata goza, relativamente, di bon salud y tabata suficiente pa algun docter di cas duna asistencia algun ora pa siman.
Pues, SABA tabata fungi como un cas di cuido, kiermen un verzorginstehuis. Cu transcurso di añanan SABA a confronta cu clientenan cu un combinacion di malesanan cronico y delicado, cu necesidad di cuido specializa.
Na e momentonan aki SABA tin un total di 287 empleado fiho y ta conta cu tres specialista den cuido medico pa hende grandi y un trahador social den servicio directo, y asina tin diferente empleado mas. Tambe tin 20 persona trahando freelance, pues cu contratonan apart pa asisti SABA y tin cu ta hacie riba un base boluntario, di mesun forma cu e Hunta di Supervision di SABA.
Meijer ta sigui splica cu un pregunta cu ta wordo haci ta ken ta e Raad van Toezicht di SABA y con e ta funciona. SABA su Raad van Toezicht ta consisti di profesional y expertonan den diferente ramo: docter, accounting, controlador di finanzas, fiscalista, experto na nivel universitario den Governance, ingeniero, y bankero, y tur tin curazon pa e adultonan mayor. Nan ta haci e trabao completamente boluntario, no ta cobra nada pa tur e trabaonan cu ta wordo eherce, hopi biaha ta reuni te oranan laat di anochi y ta delibera den fin di siman, etc.
“Por bisa cu cada miembro di Raad van Toezicht tin hopi aña di experiencia den nan ramo di specializacion. Den otro articulo, DIARIO lo sigui elabora riba e conferencia di prensa aki.
