*Pero cantidad di camber y di bishitantenan ta sigui subi
ORANJESTAD (AAN) – Cantidad suficiente di trahado ta esencial pa un empresa duna e servicio na cliente, manera mester ta y sigur den e industria di turismo. Un preocupacion cu FTA tin, ta cu na Aruba scarcedad di trahado ta aumenta cada bez mas.
Pa lunanan caba, si no ta pa añanan, Federacion di Trahadornan di Aruba (FTA), ta mira cu e cantidad di empleadonan ta baha, specialmente door cu e cantidad di cambernan ta aumenta y e cantidad di bishitantenan cu Aruba ta ricibi ta subi, no por brinda e servicio manera mester ta, y esaki ta un preocupacion cu Presidente di FTA, Hose Figaroa, a reitera y ta sigui menciona den mas di un ocasion.
Den un entrevista cu DIARIO, Figaroa a menciona cu na Aruba tin dos problema: uno na corto plazo cu ta aworaki unda cu aki dos pa tres aña cambernan di hotel ta bin acerca, cual ta haci cu mester di mas trahado pa atende cu esakinan, y banda di esaki tin otro problema, tambe na termino corto, pero cu ta bay hopi mas largo, cu ta envehecimento di nos poblacion.
“Bo tin, cu durante e proximo añanan e cantidad di trahadornan cu ta yega edad di pensioen ta bira cada bez mas y mas grandi. Si nos coi e proximo 15 añanan bo tin casi 18 mil trahado cu lo ta yegando edad di pensioen, y esey kiermen cu e persona aki lo ta saliendo for di e mercado laboral, locual ta haci cu funcionnan ta bin habri y gewoon, mester di hende pa yena nan”, Hose Figaroa a señala.
Kiermen, tin dos factor cu ta hunga un rol grandi pa cu nos mercado laboral aworaki, y e “red tape” pa parce, en todo caso, pa loke ta corto plazo e problema, segun e Presidente di e federacion.
“Akinan tin hopi deber cu e hecho cu cierto exigencianan den e rekisitonan di e mercado laboral, unda bo ta bay wak si tin hendenan local pa haci cierto trabaonan, y despues cu bo confirma si tin e hendenan aki bo ta bay over na considera hendenan di afo”, Figaroa a subraya.
E unico problema ta cu tin algun funcion cu bo sa di adelanta cu no tin persona local pa hacie. Sigur den lo loke ta tareanan di housekeeping, etc., pa hopi tempo caba bo no ta haya hende local. Y na e momentonan aki den tur funcion bo tin escasez di dje, for di waiters te bartender y housekeeping tin scarcedad di dje.
