Presentacion di Sustainable Development Goals na alumnonan di Colegio San Hose

Ministro Geoffrey Wever a bay duna esaki

ORANJESTAD (AAN): E siman aki alumnonan di klassen 6 di Colegio San Hose a ricibi  presentacion di e metanan di desaroyo sostenibel, e ‘Sustainable Development Goals (SDGs)’, duna door di Minister Geoffrey Wever.

   E proyecto aki a cuminsa aña pasa unda 6e klasnan di scolnan basico ta haya presentacion pa yuda cu conscientisacion di kico e metanan di desaroyo sostenibel ta ensera y con cada un di nos por yuda na logra e metanan. E presentacion tabata uno interactivo na cual e hobennan a participa activamente. Hobennan tin e oportunidad pa haci un diferencia pa nan mes, nan famia y pa nan comunidad.

   E Metanan di Desaroyo Sostenibel ta consisti di 17 metanan riba cual paisnan ta traha pa alcansa den nan contexto nacional. E metanan ta: 1. Caba cu pobreza; 2. Caba cu hamber; 3. Salud y bienestar; 4. Enseñansa di calidad: 5. Igualdad di genero; 6. Awa limpi; 7. Energia limpi y economico; 8. Trabao decente y crecemento economico.

  Tambe tin: 9. Innovacion y infrastructura; 10. Reduci desigualdad; 11. Barionan y comunidadnan sostenibel; 12. Produccion y consumo responsabel; 13. Accion riba clima; 14. Bida bou awa; 15. Bida riba tera; 16. Paz, husticia y institucionnan formalisa; 17. Partnership pa logra e metanan.

   Minister Geoffrey Wever na final a manda palabra di danki na Colegio San Hose pa a ricibi’e.