Preparando un decision grandi pa reactiva henter zona di ex-Refineria

Desaroyo di Hydrogen Valley pa Aruba

• Ministro Glenbert “For di Groningen pa henter nos pueblo” 

ORANJESTAD (AAN) – Minister di Energia, señor Glenbert Croes, a emiti un declaracion for di Groningen, Hulanda, pa informa pueblo di Aruba cu su persona cu su delegacion, ta trahando cu e mision di prepara pa e decision grandi di e reactivacion di henter e zona di e ex-refineria.

Nan ta yama esaki e zona di energia LNG Valley, Aruba Hydrogen Valley, unda cu lo percura pa reactiva e industrianan di energia, cu lo worde ubica akinan. Ta trata aki di industrianan di energia limpi, renovable cu lo cuida e medio ambiente di Aruba, pa e calidad di bida di henter nos poblacion.

E mandatario a remarca cu, cu e proyecto aki e  pueblo lo haya bon trabao, bon paga, e contratistanan lo haya bon trabao, bon contrato y Aruba su economia lo florece, sin huma preto cu ta afecta e calidad di bida y salud di nos ciudadanonan y pueblo di Aruba progresa den gran forma, y gobierno di Aruba florece, haya su entradanan, y un prosperidad comparti pa un y tur.

“Y pesey mes,  nos ta na Groningen, Hulanda, hunto cu e delegacion cu durante tur e dianan aki a consisti di e Refineria NV, WEB Aruba NV, NV Elmar. Utilities NV, y mi a worde acompaña pa Minister Plenipotenciario na Hulanda, mr. Ady Thijzen, y tambe pa e persona cu ta e figura di full e desaroyo di industria di hydrogen na Hulanda, señor Patrick Cnubben, cu ta hunto cu nos guiando e proceso di desaroyo di Aruba Hydrogen Valley” Croes a duna di conoce.

El agrega cu den turismo Aruba ta conoci como “one happy island” y aworaki cu e desaroyo energetico di Hydrogen como e “one happy hydrogen Island”, esta e desaroyo di Hydrogen Valley Aruba, na San Nicolas.

E mandatario ta kere cu Aruba ta tumando e liderazgo den nos region, pa mustra mundo henter cu loke e refineria a representa pa Aruba cien aña, aworaki e Hydrogen Valley na San Nicolas lo representa un pilar economico nobo, cu no ta turismo, diversificando di turismo pa rebiba un industria energetico, cu ultimo añanan tabata cera.

“Pa mi esey ta e importancia di e mision aki. Esaki ta e speranza y positivismo tangible cu nos kier transmiti na henter nos comunidad, cu ta acompaña nos mision akinan: e speranza di mira e zona di e refineria worde redestina LNG Valley, e LNG Zone, pa industrianan energetico limpi, renovable cu lo crea atrobe e pilar economico, y e actividad economico, creando trabao pa tur esnan cu a perde trabao den e refineria, y a haya trabao afo, pa nan bin bek”, Glenbert Croes a bisa. “E prosperidad pa San Nicolas y henter Aruba, ta e motor cu ta motiva nos den nos trabao tur dia”, e dignatario a expresa.