Un aña escolar nobo ta haya su inicio na un mundo di reto
*Avance tecnico y e herment cu awe ta considera moderno
*Cambio riba tur tereno ta dicidi pa estilonan nobo di bida
ORANJESTAD(AAN)—Un aña escolar nobo ta haci su entrada. Vacacion di school ta keda atras den un comunidad cu generalmente ta acomoda su mes den un situacion mas relaha ora porta di schoolnan ta cera.
Pa generacionnan nobo e preparacionnan pa un futuro desconoci, ta haya su inicio. Mester papia di generacionnan teniendo cuenta cu e diferencia di edad na e diferente institutonan educacional.
Den pasado studiante generalmente tabata tin cierto limite di edad. Den e realidad actual estudio ta tuma un tempo mas prolonga mientras mas y mas hende mester di educacion specialisa ariba nan tereno pa por sigui dilanti.
Desaroyo ta tuma lugar diariamente den tur sector di comunidad, cu asina ta duna prueba di e importancia cu cada sector di un comunidad, ta representa pa e totalidad.
Na inicio di e aña escolar, na prome lugar mester tin gratitud nacional pa e hecho cu na Aruba, educacion no ta un opcion pa un grupo privilegia pero ta base di e comunidad.
Nos kier para un rato keto pa ta solidario cu esnan cu pa condicionnan di bida manera enfermedad, no por ta parti di e proceso preparativo pa participacion activo na comunidad. Sinembargo, e solidaridad di un Pueblo ta haci cu nan tambe ta participe di e fruto di un bon sistema educativo tin pa un pais.
Na e momentonan cu schoolnan di Aruba ta habri nan porta pa alumnonan, na mundo cantidad di mucha no por soña di e futuro cu muchanan na Aruba practicamente ta considera como garantia pa nan bida.
Bomnan ta rementa na paisnan cu ta na guera cu otro. Pobreza extremo cada dia ta bira peor sigur pa e mucha cu ni sikiera por crece na su cas y na su pais, pero como refugiado mester acepta e trato cu personanan di bon boluntad y programanan di asistencia ta entrega.
Un aña escolar nobo a anuncia su mes na Aruba, caminda sin duda tin hopi motibo pa for di awor splica muchanan con grandi nan beneficio di ciudadano di Aruba ta pa asina inculca den nan tambe e responsabilidad cu nan tin pa prolongacion di e calidad di bida di Aruba pa futuro generacionnan ariba tur tereno.
Estilonan nobo di bida sin duda lo presenta. Kico esaki lo encera pa e mucha lo ta mucho mas impactante cu solamente material nobo pa school.
Ta dificil pa splica e mucha chikito kico ta pasa awor na mundo pero si mester percura pa loke ta pasa awe na mundo ta parti di su preparacion pa tur loke e futuro di inseguridad por trece.
Manera ya bisa e mester acepta e condicionnan general di bida di Aruba cu gratitud pero mester habri su wowo tambe pa otro condicionnan humano importante pa asina e por tin e mentalidad cu Aruba y mundo mester den un futuro, cu lo ta resultado di loke tin awe na nivel internacional.
Progreso tecnico ta habri caminda pa diariamente e necesidad di labor cu ta base di economia, conoce ampliacion. E necesidadnan material y di conocemento cu e comunidad mester, lo ta responsabilidad di e mucha di awe.
Con leo desaroyonan lo yega, ta dificil pa bisa y asegura pero loke si ta importante ta, cu educacion cientifico ta wordo acompaña pa educacion civico ariba tur tereno pa e mucha y hoben di awe den futuro ta mas cu un mecanismo cu ta produci pa su pais, pero ta entrega su mes cu amor pa su pais.
E aspecto humano sin duda na e momentonan aki na mundo, ta uno di e retonan grandi. Sernan humano ta wordo prepara na school pa ta den sirbishi di ser humano, cu ta e base di comunidad cu mester funciona di tal forma, cu e ta entrega bienestar na su mes pero tambe na su nacion.
E seguridad di awe no ta e seguridad di futuro ora e mucha mester ricibi su lugar den comunidad. Con relacionnan den Reino lo ta y con e relacionnan nobo na un mundo cu mecanismo cu ta afecta relacion humano.
Vacacion ta tras di lomba y comunidad mester regresa normalidad na inicio di un aña escolar cu lo contene retonan pa sigui dilanti.
Cu paso firme awe mester cana den direccion di solucionnan pa asuntonan cu un dia e muchanan cu awe ta bay school lo reemplaza cu e adelanto cu educacion ta entrega na nan generacionnan como ciudadanonan productivo nobo di Aruba cu sin duda mester enfrenta estilonan nobo den realizacion di e proceso di crecemento personal y nacional.
