ORANJESTAD (AAN): E biaha aki ta papiando di ‘Grupo Posadas’, cu tin ya caba varios hotel y resort operando exitosamente,
y cu awor nan plan ta pa habri uno na Aruba, y tambe uno na Jamaica. Nan ta mira cu tin potencial pa bin cu diferente proyecto nobo.
Esey ta loke prensa na Mexico a divulga riba e asunto aki.
Despues cu e compania hotelero ‘Grupo Posadas’ a sali di nan proceso di restructuracion financiero, nan a bisa cu nan tey caba den negociacionnan pa habri Hotel na dos pais nobo, esta Aruba y Jamaica.
Enrique Calderón kende ta vice-president di operacion di e compania, a bisa cu tin un oportunidad grandi den Caribe pa sigui cu nan plannan di expansion, y asina yega cu nan marca na otro paisnan, unda nan no tin hotel ainda.
Segun Calderón a declara na prensa, cu na Aruba y Jamaica nan lo no djis bay habri un hotel, sino cu nan ta mira potencial pa habri diferente proyecto.
Grupo Posadas ta un compania grandi di hotelnan luhoso na Mexico, y nan tin 181 propiedad, y 28.633 camber na destinacionnan di ciudad y beach di Mexico y Republica Dominicana. Na e pais di merengue nan tin solamente un hotel, pero tin plan poni caba riba mesa pa habri 3 proyecto mas.
Mas detaye no a wordo duna di e plannan aki. Pero Grupo Posadas tin algun hotel luhoso y exclusivo bao di e.o. nombernan registra di ‘Live Aqua Resorts’, ‘Curamoria Collection’, ‘Grand Fiesta Ameircana Resorts’, ‘Gamma Hotels’, ‘Fiesta Americana Hotels’, ‘IOH Freestyle Hotels’, ‘Explorean Discovery Resorts’, ‘Fiesta Inn Hotels’, y tambe ‘One Hoteles’.
