Presidente di Corte Comun di Husticia Huez Maurits de Kort:
ORANJESTAD (AAN) – Huez Maurits de Kort, Presidente di Corte Comun di Husticia, den entrevista cu DIARIO a duna su opinion, tocante locual a bin dilanti durante e sesion, unda a elabora tocante e rol di prensa.
El a expresa cu durante e sesion prensa a haya hopi atencion, pero no den e sentido negativo sino mas bien den forma positivo.
El a trece dilanti cu nan como Hof tambe tin interes cu nan tin cu sirbi: interes di transparencia di seccionnan cu mester ta abiertamente pa publico, pero tambe tin e aspecto di privacidad, y nan kier trece un balansa entre ambos concepto. Esta, e privacidad di un banda y e apertura pa informa di e casonan.
El a señala cu loke tanto Procurador General como Orden di Abogado a trece dilanti ta: “Prensa por fabor, tene cuenta cu ora bo ta haciendo uso di bo derecho di duna informacion, corda si cu e mester ta proporcional. Kiermen, pensa bon kico e meta ta ora bo ta uza, por ehemplo, cierto potretnan di accidente; ki meta e potret ey ta sirbi, pa duna informacion? Of eigenlijk e no ta necesario pero e ta pa duna nos e informacion haci mas caweta”, Huez de Kort a comenta.
